Naqif Həmzəyev: “Azərbaycanın qazına Avropa dövlətlərinin çox böyük ehtiyacı var”
“Azərbaycan respublikası prezidenti cənab İlham Əliyev Avropaya-Bolqarıstana səfəri çox yaddaqalan, məhsuldar, uğurlu bir səfər kimi dəyərləndirilməlidir.
Bu səfər ilk növbədə Azərbaycanın enerji potensialının və Avrropanın enerji təhlükəsizliyində Azərbaycanın rolunun artırılmasına xidmət edirdi”.
Bunu 1news.az-a açıqlamasında Milli Məclisin deputatı Naqif Həmzəyev deyib.
“Həmçinin Azərbaycanın kommunikasiya xəttlərinin üzərində yerləşməsi və Azərbaycan üzərindən yükdaşımaların həcminin artırılması Avropa və Azərbaycan arasında əlaqələrin güclənməsinə çox böyük zəmin yaratmış oldu.
Azərbaycan TANAP və TAP layihələrindən sonra Avropanın digər ölkələrinə də Azərbaycan qazının nəql edilməsi ilə bağlı bir çox layihələr üzərində işləyir və artıq Yunanıstandan Bolqarıstana çəkilən qaz xəttinin istifadəyə verilməsi reallaşdı. Bu o deməkdir ki, Azərbaycan qazı artıq Balkanlara və Avropanın içərilərinə doğru da verilə biləcəkdir. Bu artıq investisiya və texniki məsələlərdir. Bolqarıstana qədər gedib çatmış Azərbaycan qazının daha sonra Şimali Makedoniya, Serbiya və digər Avropa ölkələrinə də çatdırılması mümkün olacaq.
Azərbaycan hazırda Avropanın enerji təhlükəsizliyində çox böyük rol oynayır və yaxın illər ərzində Azərbaycanın Avropaya qaz nəqli 2 dəfədən çox artırılmalıdır. Bununla bağlı Avropa İttifaqı ilə anlaşma imzalanıbdır və bu məsələ də reallaşacaq. Azərbaycanın qaz potensialı imkan verir ki, bunu reallaşdırsın.
Bunlarla yanaşı, Azərbaycan yalnız enerji nəqli ilə deyil, coğrafi mövqeyinin və Azərbaycanın bu illər ərzində müasir nəqliyyat xəttlərinin formalaşdıra bilməsi sayəsində vahid nəqliyyat şəbəkəsini formalaşdırıb. Azərbaycan hal-hazırda şərqdən qərbə, şimaldan cənuba nəqliyyat dəhlizinin tam mərkəzində yerləşir və bu gün tranzit yüklərinin Avropaya, xüsusilə də Bolqarıstana daşınması üçün əlverişli şərait formalaşdıra bilib. Bu baxımdan da cənab prezident öz çıxışında qeyd etdi ki, artıq indidən Azərbaycan və Bolqarıstan nəqliyyatçıları bu məsələləri müzakirə etməli və yaxın gələcək üçün bu işlərin hazırlıqlarını görməlidirlər. Göründüyü kimi Azərbaycanın Avropada” mövqeyi günü-gündən güclənir. Azərbaycanın qazına Avropa dövlətlərinin çox böyük ehtiyacı var. Yaxın gələcəkdə bu Avropanın milli təhlükəsizlik məsələsinə çevriləcək. Bu baxımdan da, Azərbaycan bu sahədə öz imkanlarını artırır və reallaşdırdığı beynəlxalq layihələr imkan verəcək ki, Azərbaycan bu prosesdə daha aktiv iştirak etsin və nəticə etibarilə Azərbaycanın iqdisadiyyatı daha da böyüsün”.
Ayşən İsmayılova
