Qiymət artımı ictimai nəqliyyatda xidmətə necə təsir göstərəcək? - “Bakubus” MMC-nin direktorundan CAVAB
Tarif (qiymət) Şurasının 31 yanvar 2023-cü il tarixində keçirilən növbəti iclasında daşıyıcı şirkətlərin müraciətlərinə baxılmış və ictimai nəqliyyatda sərnişindaşıma xidmətləri üzrə yeni tariflər təsdiq edildi.
Hər kəs üçün gözlənilməz olan qiymət artımı ictimai nəqliyyat istifadəçiləri tərəfindən heç də birmənalı qarşılanmayıb və narazılıqlara səbəb olub.
Məsələ ilə bağlı 1news.az-ın suallarını cavablayan "Bakubus" MMC-nin direktoru Elnur Qarayev qiymət artımının səbəblərindən danışıb.
“Son 2-3 ildə dünyada baş verən müxtəlif siyasi vəziyyətlər ehtiyat hissələrinin qiymətinin 35%, 40%, 45% qalxmasına səbəb olmuşdu. Bizim üçün 30 qəpik ilə müasir avtobusların aidiyyəti qaydada təmir etmək, onların baxışlarını reqlamentə uyğun həyata keçirmək çox çətin idi.
Özünüz də görürdünüz ki, dəfələrlə sərnişinlərin kondisionerlərlə, yolda qalan avtobuslarla bağlı (bu bütün daşıyıcı şirkətlərə aiddir) şikayətləri olurdu və onların təmirinin həyata keçirilməsi çox çətin idi. Sırf buna görə də bütün daşıyıcılar Tarif Şurasına müraciət etdilər ki, son 5 ildə qiymət artımına gedilməyib. Bu proses axırıncı dəfə 2018-ci ilin avqustunda baş verib. Son 5 ildə digər sahələrdə olduğu kimi həm dövlətimizin büdcə təşkilatlarında, həm özəl sektorun özündə əməkhaqqı artımları olub, amma nəqliyyat sahəsində olanların (sürücülər, ustalar, təmizləyicilər) əməkhaqqını artıra bilmir və bazarda uyğunsuzluq yaranır. Buna görə də kollektiv şəkildə Tarif Şurasına müraciət olundu və qiymət artımına gedilməsi üçün məsələ qaldırdıq.
Təbii ki, 40 qəpik də xərclərimizi tam ödəməyəcək. Amma hamımız bilirik ki, Azərbaycan sosialyönümlü ölkədir və xüsusən də ictimai nəqliyyatdan istifadə edən insanların gəlir səviyyəsi nəzərə alınıb. Ona görə də yalnız 10 qəpiklik artıma gedilib” - deyə, E.Qarayev bildirib.
Qeyd edək ki, yeni tarifin qəbulundan sonra belə Bakıda sərnişin daşıma tarifləri əksər MDB ölkələri ilə müqayisədə ən aşağı qiymət hesab olunur:
Avropa ölkələrində isə nəqliyyatda tariflər Azərbaycandakı göstəricilərdən dəfələrlə yüksəkdir.
