“Batareyaları təhvil ver, təbiəti qoru” layihəsi çərçivəsində 201 kiloqram işlənmiş batareya toplanıb
“Batareyaları təhvil ver, təbiəti qoru” layihəsi çərçivəsində Müdafiə Sənayesi Nazirliyindən, “Araz” marketlər şəbəkəsinin Yasamal və Sumqayıt filiallarından ümumilikdə 55 kiloqram işlənmiş batareya toplanılaraq “Təhlükəli Tullantılar” Məhdud Məsuliyyətli Cəmiyyətinə təhvil verilib.
1news.az Ekologiya və Təbii Sərvətlər Nazirliyinin (ETSN) feysbuk səhifəsinə istinadla xəbər verir ki, ETSN və “Qırmızı Ürəklər” Fondu tərəfindən start verilmiş layihə çərçivəsində ilin ötən dövrü ərzində 201 kiloqram işlənmiş batareya toplanıb.
Həmin layihə ətraf mühitin mühafizəsi, insanların sağlamlığının qorunması, işlənmiş batareya tullantılarının zərərli təsirlərinin qarşısının alınması və səmərəli idarə olunması cəhətdən olduqca vacibdir və maarifləndirici məqsəd daşıyır.
Nazirlik hər kəsi tullantıların çeşidlənməsi qaydalarına riayət etməyə, təhlükəli və istifadəyə yararsız batareyaların məişət tullantılarına qarışdırılmasına yol verməməyə və batareyalar üçün ayrılan xüsusi qutulardan istifadə etməyə çağırır.
