Bir neçə ölkənin qida obyektləri Azərbaycana məhsul gətirmək hüququ qazanıb
Azərbaycan Qida Təhlükəsizliyi Agentliyi (AQTA) bu ilin əvvəlindən Rusiya, İran, Belarus və digər dövlətlərdə yerləşən bir sıra qida obyektlərini təsdiq və ya şərti təsdiq edib.
Bu barədə 1news.az-a AQTA-dan məlumat verilib.
Qeyd olunub ki, həmin müəssisələr məhsullarını Azərbaycana ixrac etmək hüququ qazanıb.
Belarusun Brest şəhərində yerləşən "Брестское мороженое" şirkətinə məxsus süd məhsullarının emalı müəssisəsinin Agentliyin mütəxəssisləri tərəfindən vizualizasiya yolu ilə qiymətləndirilməsi aparılıb. Qiymətləndirilmənin nəticələri Agentlik sədrinin müvafiq əmri ilə formalaşdırılmış Komissiyanın növbəti iclasında müzakirə edilərək, müəssisənin təsdiq edilməsi, şərti təsdiq edilməsi və ya təsdiqdən imtina edilməsi barədə qərar qəbul ediləcək.
Agentlik tərəfindən xarici ölkələrin səlahiyyətli dövlət qurumlarına müəyyən edilmiş möhlət bitdikdən sonra təsdiq edilməmiş obyektlərdən məhsulların idxal edilməsinə məhdudiyyət tətbiq ediləcəyinə dair xəbərdarlıq məktubu göndərilib.
Xatırladaq ki, “Qida təhlükəsizliyi haqqında” qanunun 24.5-ci maddəsinə əsasən, müəyyən edilən qida və yem məhsullarının Azərbaycanın gömrük ərazisinə idxal olunması üçün həmin məhsulların istehsal və emal edildiyi qida obyektləri həmin obyektlərə cavabdeh qida subyektlərinin müraciəti əsasında Agentlik tərəfindən təsdiq edilməlidir.
Xarici ölkələrdə fəaliyyət göstərən qida obyektinin təsdiq olunması üçün obyektin Azərbaycanda qida təhlükəsizliyi sahəsində mövcud olan tələblərə uyğunluğu Agentlik tərəfindən yerində qiymətləndirilmə aparılmaqla və ya vizualizasiya (videogörüntü) yolu ilə qiymətləndirilir. Qiymətləndirilmə nəticələrinə əsasən, obyektin təsdiq edilməsi, şərti təsdiq edilməsi və ya təsdiqdən imtina edilməsi barədə qərar qəbul edilir. Qanunun 24.8-ci maddəsinə əsasən, qiymətləndirilmənin aparılması ilə bağlı xərclər həmin obyektlərə cavabdeh olan qida subyektlərinin və ya səlahiyyətli nümayəndəsinin vəsaiti hesabına ödənilir.
