3-cü “Yüksəliş” müsabiqəsində say çoxluğuna görə ilk 5 yeri bu bölgədən olan namizədlər tutur
3-cü "Yüksəliş" müsabiqəsinin onlayn mərhələsində 1325 nəfər əyani mərhələyə keçib.
1news.az xəbər verir ki, bunu gənclər və idman nazirinin müavini, "Yüksəliş" müsabiqəsinin İşçi qrupunun rəhbəri Fərhad Hacıyev deyib.
O qeyd edib ki, 1325 namizəddən 1289 nəfəri Azərbaycanda, 118 nəfəri xaricdə bakalavr təhsili alıb.
“Uğur qazananlardan 300 baldan aşağı bal toplayaraq bakalavr təhsili alanlar 6,49 faiz, 601-700 bal arası bal toplayanlar isə 30,26 faizdir.
Əyani imtahana keçənlərdən 1043 nəfəri magistratura təhsillidir. Onlardan 813 nəfəri Azərbaycanda, 230 nəfəri xaricdə təhsil alıb.
Əyani mərhələyə keçənlərdən 102 nəfəri isə doktorantura təhsillidir.
F. Hacıyev bildirib ki, müsabiqədə uğur qazananlar daha çox Bakı şəhərindəndir (771 nəfər - 58,19 faiz).
“İkinci yerdə Abşeron-Xızı (85 nəfər - 6.42 faiz), 3-cü yerdə Qarabağ (56 nəfər - 4.23 faiz, 4-cü yerdə Lənkəran-Astara (52 nəfər - 3.92 faiz), 5-ci yerdə isə Şəki-Zaqatada qərarlaşıb (52 nəfər - 3.92 faiz).
Qeyd edək ki, "Yüksəliş" müsabiqəsinin 20 qalibini 1 il ərzində idarəçi rəhbərlərdən - iri şirkətlərin top-menecerlərindən və dövlət orqanlarının rəhbərlərindən fərdi karyera məsləhətləri almaq imkanı, kadr ehtiyatı bankına daxil edilmə və 20.000 AZN dəyərində pul mükafatı gözləyir.
"Yüksəliş" müsabiqəsi Azarbaycan Respublikası Prezidenti İlham Əliyevin 26 iyul 2019-cu il tarixində imzaladığı Sərəncamla təsis olunub.
