1-ci “Xəzər Beynəlxalq Nəqliyyat və Logistika Forumu” öz işinə başlayıb

Bu gün Bakı Konqres Mərkəzində daha bir beynəlxalq tədbir - 1-ci “Xəzər Beynəlxalq Nəqliyyat və Logistika Forumu”öz işinə başlayıb.

1news.az xəbər verir ki, İlk dəfə təşkil olunmuş forum 31 may-2 iyun tarixlərində ölkəmizdə baş tutan20-ci Yubiley Xəzər Beynəlxalq Nəqliyyat, Tranzit və Logistika “Translogistica Caspian” Sərgisi çərçivəsində keçirilir.

Azərbaycanın nəqliyyat-logistika sahəsində əhəmiyyətli rolu “Translogistica Caspian” sərgisi çərçivəsində 1-ci “Xəzər Beynəlxalq Nəqliyyat və Logistika Forumu”nun təşkili zərurətini yaratmışdır. Bakı Konqres Mərkəzində keçirilən forumda Azərbaycanın dövlət qurumları, Transxəzər Beynəlxalq Nəqliyyat Marşrutu, Beynəlxalq Ekspeditorlar Assosiasiyaları Federasiyası (FIATA), Beynəlxalq Logistika və Nəqliyyat İnstitutu (CILT), Dəmir Yolları Əməkdaşlıq Təşkilatı (OSJD) kimi qlobal təşkilatlar, müxtəlif ölkələrin nəqliyyat eskpedisiya assosiasiyaları, xarici və yerli nəqliyyat sektorunun peşəkarları bir araya toplaşıb. Forum nəqliyyat sektorunun həm yerli, həm də beynəlxalq oyunçuları arasında məlumat və təcrübə mübadiləsinin aparılması, işgüzar ünsiyyət, netvörkinq və etibarlı biznes münasibətlərinin qurulması, eləcə də mövcud biznes əlaqələrinin daha da genişləndirilməsinə imkan yaradır. Forum maraqlı tərəflər üçün yeni tərəfdaşlar qazanmaq və səmərəli əməkdaşlıqlar formalaşdırmaq üçün önəmli platformadır.

Tədbirdə Azərbaycanın beynəlxalq logistika marşrutlarını birləşdirərək HUB-a çevrilməsi, tranzit perspektivləri, logistika məsrəflərinin optimallaşdırılması, müasir logistikada yeni texnologiyalar və avtomatlaşdırılma, logistika sektorunda insan kapitalı, peşə təhsili və təlimi kimi mövzular müzakirə olunacaqdır.

Forum çərçivəsində bir sıra sessiyalar və panel müzakirələri keçiriləcəkdir. "Loqistika infrastrukturu və KOB-lar üçün yeni imkanlar", "Tranzit Perspektivləri və beynəlxalq gömrük standartlarına uyğunluq", eləcə də "İnsan kapitalı, peşə təhsili və təlimi (VET)" üzrə müzakirələr aparılacaqdır.

1-ci “Xəzər Beynəlxalq Nəqliyyat və Logistika Forumu”-na Azərbaycan Respublikası Rəqəmsal İnkişaf və Nəqliyyat Nazirliyi, Azərbaycan Dövlət Gömrük Xidməti, Azərbaycan Respublikası Kiçik və Orta Biznesin İnkişafı Agentliyi (KOBİA), Yaşıl Dəhliz Xidməti QSC, “TRACECA” Hökumətlərarası Komissiyasının Daimi Katibliyi, Azərbaycan Gömrük Təmsilçiləri və Logistika Şirkətlərinin Assosiasiyasına (AGTL), Beynəlxalq Ekspeditorlar Assosiasiyaları Federasiyası (FIATA), Beynəlxalq Logistika və Nəqliyyat İnstitutu (CILT), Dəmir Yolları Əməkdaşlıq Təşkilatı (OSJD) və Azərbaycan Sərgi Təşkilatçıları Assosiasiyası (ASTA) tərəfindən dəstəklənir.

1-ci “Xəzər Beynəlxalq Nəqliyyat və Logistika Forumu”nun sponsorları Azərbaycan Nəqliyyat Ekspeditor şirkətləri Assosiasiyası, “Azərbaycan Hava Yolları” QSC , "Azərbaycan Dəmir Yolları" QSC, "Silk Way West Airlines" aviaşirkəti, “GATE BAKU”, GBL Group QSC və “Sinara Transport Machines”dir.

Forumun təşkilatçıları isə Caspian Event Organisers şirkəti və Azərbaycan Gömrük Təmsilçiliyi və Logistika Şirkətlərinin Assosiasiyasıdır. Ətraflı məlumatı forumun saytından əldə etmək mümkündür: https://konfrans.az/