Hacıbəy Heydərli: “Tiktok” 2023-cü ilin birinci rübündə Azərbaycanda 390 mindən çox videonu silib”

Bu gün "Tiktok" sosial şəbəkəsinin - Şərqi Avropa və Mərkəzi Asiya üzrə kommunikasiyalar rəhbəri Kristina Eremeeva ilə görüşdük.

1news.az xəbər verir ki, bunu Azxəbər.com saytının baş redaktoru, Mətbuat Şurasının üzvü Hacıbəy Heydərli öz "facebook" səhifəsində yazıb.

O, bildirib ki, görüşdə "Tiktok"un fəaliyyəti haqda geniş məlumat verildi, təqdimat edildi.

"Şirkətin rəsmisi bildirdi ki, "Tiktok" 2023-cü ilin birinci rübündə Azərbaycanda 390 mindən çox videonu silib. Bu ölkəmiz üçün kifayət qədər böyük rəqəmdir, demək ki, bu sahədə ciddi işlər aparmaq lazımdır.

Görüşdə mənim üçün qaranlıq qalan bir çox məqama aydınlıq gətirildi, xanım Eremeevaya bir müddət öncə Mətbuat Şurasında "tiktok"da fəal olan jurnalistlərlə görüşümüzdə səslənən sualları çatdırdım.

Qeyd etdim ki, "Tiktok"un ən böyük problemi təhlükəsizlik məsələsidir. Bununla bağlı addımlar atılsa yaxşı olar".

"Bundan başqa tənzimləmələrdə Azərbaycan dilinin olmaması da ciddi problemdir. Qeyd edildi ki, bu istiqamətdə iş aparılır" deyə, H.Heydərli əlavə edib:

"Daha bir sualım isə "Tiktok"da kontent yaradan şəxslərə qrant, dəstək verilməsi ilə bağlı oldu. Xanım bildirdi ki, bununla bağlı da yeniliklər olacaq.

Düşünürəm ki, "Tiktok"un ölkəmizlə əməkdaşlığı və rəsmi şəxslərinin mütəmadi görüşləri bu sosial şəbəkədəki neqativlərin qarşısını almağa yardımçı olacaq.

Eyni zamanda bildirim ki, Mətbuat Şurasında baş tutan görüşdə səslənən bütün təklifləri "Tiktok"un baş ofisinə rəsmi şəkildə çatdırmışıq".