ABADA rəsmisi: Bu ilin 6 ayında 1137 daşıyıcıya təlim keçirilib

“Avtodaşıyıcılarımızın xarici ölkələrdə rastlaşdıqları problemlər barədə və onların həlli məqsədilə Rəqəmsal İnkişaf və Nəqliyyat Nazırliyinə təkliflər verilib” .

1news.az xəbər verir ki, bunu Azərbaycan Beynəlxalq Avtomobil Daşıyıcıları Assosiasiyasının Baş katibi vəzifəsini icra edən Kənan Qurbanov bu gün keçirilən mətbuat konfransında məlumat verib.

O bildirib ki, hesabat ilində təhlükələri yüklərin beynəlxalq daşımaları haqqında Konvesiyaya uyğun olaraq, normativ sənədlərin hazırlanması üçün Nazirliyə təkliflər verilib.

Baş katibi vəzifəsini icra edən Kənan Qurbanov cari ilin ölkəmiz üçün çox əhəmiyyətli bir dövr olduğuna diqqət çəkərək, cənab Prezidentin 6 ayın yekunlarına dair nəticələr və qarşıya qoyulan vəzifələrdən söz açıb.

Bildirib ki, ABADA da öz növbəsində əsasnaməsindən və illik fəaliyyət planlarından irəli gələn öhdəliklərə əsasən bu vəzifələrini icra etməyə çalışır.

Kənan Qurbanov diqqətə çatdırıb ki, hesabat ilində 1137 daşıyıcıya, 138 operatorun məsul şəxsinə Beynəlxalq daşımalar haqqında təlim-tədris keçirilərək Şəhadətnamələr verilib.

“Bundan başqa 126 daşıyıcıya təhlükləli yüklərin daşınması barədə təlim kursları keçirilərək, Şəhadətnamələr verilib” .