Norveçdə azərbaycanlı yeniyetmənin “Qarabağı gözəl gördüm” adlı ilk sərgisi keçirilib
5- 13 avqust tarixlərində Oslo Beynəlxalq Uşaq İncəsənət Muzeyində - (The International Museum Of Children's Art's) Norveç Azərbaycan Gənclər Təşkilatının(NAYO), Nizami Gəncəvi adına həftəsonu Azərbaycan dili məktəbinin təşkilatçılığı ilə vətənpərvər və istedadlı 14 yaşlı şagirdimiz Səlim Abbaszadənin "Qarabağı gözəl gördüm" adlı ilk sərgisi keçirilib.
Sərgidə məktəbin şagirdləri, müəllimləri, Norveçdəki Azərbaycan icmasının üzvləri və muzey ziyarətçiləri iştirak ediblər. S.Abbaszadənin sərgisində əsasən Azərbaycanın işğaldan azad olunmuş əraziləri ilə bağlı rəsmləri nümayiş olunub. Sərgidə nümayiş olunan rəsmlər arasında Azərbaycanın mədəniyyət paytaxtı Şuşada yerləşən “Gövhər Ağa məscidi”, “Şahbulaq qalası”, gözəllik və zəriflik simvolu olan “Xarıbülbül” çiçəyi və “Tıq-tıq xanım” rəsmi sərgi iştirakçıları tərəfindən çox böyük maraqla qarşılanıb.
S.Abbaszadə sərgi iştirakçılarına Azərbaycan və Qarabağın tarixi və çəkdiyi hər bir rəsm haqqında norveç və ingilis dillərində məlumat verib.
Sözügedən muzeyin direktoru Angela Goldin S.Abbaszadənin rənglərin, fırçanın və istedadının köməyi ilə çəkdiyi təbiət rəsmlərində təsvirlərin gözəl ,ecazkar və maraqlı olduğunu qeyd edib və bildirib ki, gənc rəssamın rəsmləri "soyuq şimal"a günəş,istilik ,sülh,gözəl və birlik bəxş edib.
Rəhbəri olduğu muzeyin əsas üç funksiyası olduğunu deyən A.Goldin bildirib ki, əsas məqsədləri dünyanın hər yerindən olan uşaqların rəsmlərini toplamaq,qorumaq və gənc istedadların rənglər dünyasını gələcək nəsillərə ötürməkdir. A.Goldin muzeyin ideyalarından irəli gələrək belə istedadlı və yenilikçi gənclərlə tanış olmaqdan çox məmnun olduğunu bildirib ,gələcəkdə də S.Abbaszadə və məktəbin digər istedadlı şagirdləri ilə də əməkdaşlıq edəcəyini vurğulayıb.
Sərginin sonunda Nizami Gəncəvi adına həftəsonu Azərbaycan dili məktəbinin şagirdi Aida Ramberq Sözləri Baba Vəziroğluna və musiqisi Cavinşir Quliyevə məxsus olan“ Qarabağı gözəl gördüm” mahnısını ifa edib.
S.Abbaszadə “Xarıbülbül” və “Tıq-tıq xanım” rəsmlərini muzeyə hədiyyə edib. Artıq muzeydə 185 ölkədən olan uşaqların müxtəlif mövzularda nümayiş olunan rəsmləri arasında şagirdimiz S.Abbaszadənin də rəsmləri yer alacaqdır.
Qeyd edək ki, S.Abbaszadə sözügedən muzeydə sərgisi nümayiş etdirilən ilk azərbaycanlı gənc rəsaamdır. Muzeyin direktoru A.Goldin bildirib ki, 1996-cı ildə Norveçə rəsmi səfəri çərçivəsində görkəmli dövlət xadimi, müstəqil Azərbaycan dövlətinin qurucusu Heydər Əliyev Beynəlxalq Uşaq İncəsənəti Muzeyini ziyarət edib və milli geyimli Azərbaycan gəlinciklərini (kuklalarını) muzeyə hədiyyə edib.
