Paralel küçələrə kanalizasiya və su çəkilsə də, 51-ci küçə qaldı - “Azərsu” Badamdar sakinlərinə cavab verdi - FOTO - VİDEO

1news.az-ın redaksiyasına oxuculardan mütəmadi olaraq müraciətlər daxil olur.

Belə müraciətlərdən biri də Səbail rayonu, Badamdar qəsəbəsi, 3-cü yaşayış massivi, 51-ci küçənin sakinlərindən daxil olub.

Müraciətdə bildirilib ki, Badamdar qəsəbəsi, 3-cü yaşayış massivi, 51-ci küçəyə paralel olan 50 və 52-ci küçələrdərə su və kanalizasiya xətti daha sonra isə asfalt çəkilsə də illərdir 51-ci küçənin kanalizasiya və su problemi həll olmur.

“Neçə ildir müraciət edirik ki, bizim küçəmizə kanalizasiya və su xətti çəkilsin, ancaq hələ də problem qalır. Hamı həyətində şambo qazaraq kanalizasiyanı ora axıdır. Üstəlik su da çox zəif gəlir. Sakinlər dəfələrlə müraciət etsə də hələ də ortada bir nəticə yoxdur. Hər dəfə vəd verilir, ancaq iş görülmür. Su və kanalizasiyanın xəttinin çəkilməsinə görə yolumuza asfalt da vurulmur ki, sonradan dağıdılacaq”.

Məsələ ilə bağlı 1news.az-ın sorğusuna cavab olaraq Azərbaycan Dövlət Su Ehtiyatları Agentliyinə məxsus "Azərsu" ASC-dən bildirilib ki, qeyd olunan ünvanda işlər sentyabr ayının əvvəllərində başlayacaq.

“Həmin ərazidə görülən işlər mərhələli şəkildə icra olunur, sentyabrın əvvəlindən Badamdar qəsəbəsi, 3-cü yaşayış massivi, 51-ci küçədə də işlər davam edəcək”