Samuxda sel suları yol infrastrukturuna və yol qurğularına ziyan vurub

Samux rayonuna yağan güclü yağış nəticəsində isə yaranan sel suları Yenikənd-Poylu avtomobil yolunun 41-42-ci kilometrlik hissəsində yol örtüyünə və yol qurğularına ziyan vurub.

1news.az bu barədə Azərbaycan Avtomobil Yolları Dövlət Agentliyinə istinadən xəbər verir.

Məlumata görə, yaranan problemlərin aradan qaldırılması üçün Agentliyin qeyd olunan rayondakı törəmə MMC-si hadisə baş verdiyi andan etibarən tədbirlər görüb, əraziyə xüsusi texnikalar və canlı qüvvə səfərbər edib.

Təxirəsalınmaz tədbirlər nəticəsində sözügedən yolda təhlükəsiz və fasiləsiz hərəkət təmin edilir, təbii fəlakət nəticəsində dəymiş ziyanın aradan qaldırılması istiqamətində işlər aparılır.