Əziz Əlibəyli: “Göstərildi ki, bu qlobal savaşda Azərbaycan və müttəfiqlərinin iradəsi həlledicidir”
Xəbər verdiyimiz kimi bu Azərbaycan Qırmızı Aypara Cəmiyyəti tərəfindən Bakıdan Xankəndidə yaşayan erməni əsilli sakinlər üçün iki maşın humanitar yük yola salınıb.
Bu humanitar yardımın əhəmiyyəti nədir? Ermənilər Azərbaycan Qırmızı Aypara Cəmiyyətinin bu addımının hansı nəticələri olacaq?
Məsələ ilə bağlı 1news.az-a danışan beynəlxalq məsələlər üzrə ekspert Əziz Əlibəyli bildirib ki, bu addım ilk olaraq, Azərbaycan əleyhinə formalaşdırılmış humanitar faciə və fəlakət anlayışına zərbə vurmaq üçün idi.
“İkincisi, Azərbaycan öz ərazisində, öz torpağında öz vətəndaşları üçün humanitar xidmət göstərə bilər fikrini ortaya qoymuş oldu, yəni “torpağın sahibi haqlıdır” yanaşmasıdır, üçüncüsü də Laçın Xankəndi yolu deyil, Ağdam-Xankəndi yolu işə düşməlidir”.
Politoloq bildirib ki, humanitar yardım üzərindən baxsaq, Xankəndi ermənisi ifadəsinin də leqallaşdırılmış olduğunun şahidi olduq.
“Qarabağ erməniləri ifadəsi siyasi leksikondan çıxıb. Qarabağ çox böyükdür, ümumi erməniləşdirmək siyasi səhvdir və yolverilməzdir. Söhbət Xankəndi ermənilərindən gedir. Bu humanitar yardım, seçim imkanı və bəhanələr məsələsinə birdəfəlik son qoyur. Eyni zamanda Fransanın da başlatdığı beynəlxalq humanitar hoqqabazlığa son qoymaq üçün nəzərdə tutulur. Göstərildi ki, bu qlobal savaşda Azərbaycan və müttəfiqlərinin iradəsi daha həlledicidir. Heç şübhəsiz ki, bu məsələnin ana xəttini təşkil edən məsələ, təhlükəsizliyin təmin olunmasıdır. Təhlükəsizlik necə təmin olunması və Azərbaycanın necə düşünməsini yaxın vaxtlarda görəcəyik”.
