Türk aktrisa Seda Fettahoğlu ad günündən bir gün sonra intihar edib

Türk aktrisa Seda Fettahoğlu ad günündən bir gün sonra intihar edib.

1news.az Türkiyə mətbuatına istinadən xəbər verir ki, “Kanlı Nigar”, “Çalıkuşu”, “Sihirli annem”, “Çocuklar Duymasın” kimi məşhur seriallar ilə tamaşaçıların qarşısına çıxan Fettahoğlu dünən səhər saatlarında Beyoğlu Ömer Avni Məhəlləsindəki “Şehitler Parkı”nda dünyasını dəyişib.

Meyiti tapan tələbə səhər saatlarında parka gəzintiyə çıxdığını, bu vaxt əvvəlcə silah səsləri eşitdiyini, daha sonra isə yerdə qadın cəsədi gördüyünü və polisə xəbər verdiyini deyib.

Fəttahoğlunun yanında ona məxsus olduğu müəyyən edilən tapança və boş patron tapılıb. Bundan əlavə, məşhur aktyorun çantasından müxtəlif antidepresan dərmanlar aşkarlanıb.

Ad günündən bir gün sonra baş verən dəhşətli hadisədə intihar etdiyi iddia edilən Fəttahoğlunun cənazəsi ətraflı müayinələrdən sonra Ədliyyə Tibb Təşkilatı Morquna təhvil verilib.

Xatırladaq ki, ötən gün Fettahoğlunun 44 yaşı tamam oldu.