Ziya Bünyadov prospektində inşa edilən piyada keçidi nə zaman istifadəyə veriləcək? - FOTO
Bir müddət əvvəl Azərbaycan Avtomobil Yolları Dövlət Agentliyi (AAYDA) tərəfindən Ziya Bünyadov prospektinin Xəlil Rza Ulutürk küçəsi ilə kəsişməsində yeni piyada keçidinin inşasına başlanılıb.
Bəs hazırda piyada keçidini inşası hansı mərhələdədir?
Məsələ ilə bağlı 1news.az-a açıqlama verən Azərbaycan Avtomobil Yolları Dövlət Agentliyinin mətbuat katibi Anar Nəcəfli deyib ki, piyada keçidinin dayaqları inşa edilib.
“Hal-hazırda zavod şəraitində aşırım hissəsinin yığılması prosesi həyata keçirilir. Yığılıb yekunlaşandan sonra, dayaqlar üzərində montajı həyata keçiriləcək. Yəqin ki, işlərin gələn ilin birinci yarısında yekunlaşması baş tutacaq”.
Xatırladaq ki, Layihə üzrə keçidin uzunluğu 57 metr, daxili eni 3.5 metrdir. Yol səviyyəsindən hündürlüyü 5.8 metr təşkil edən keçid üstüqapalı və torşəkilli metal konstruksiyadan ibarət olacaq.
İki giriş-çıxışdan ibarət olması nəzərdə tutulan keçiddə fiziki məhdudiyyətli insanların rahat hərəkətini təmin etmək üçün beynəlxalq standartlara uyğun oval tipli piyada pandusları quraşdırılacaq.
Layihə çərçivəsində yolun hər iki tərəfində yeni avtobus ciblikləri, avtobus dayanacağının, keçidin istismarına nəzarət edən işçilər üçün nəzarət otağının tikintisi, piyada keçidinin ətrafında abadlaşdırılma işlərinin görülməsi nəzərdə tutulub.
