Xidmət rəisi: “Su obyektlərində fasiləsiz hidrometeoroloji müşahidələr aparılır”
“Azərbaycan Respublikasının Ekologiya və Təbii Sərvətlər Nazirliyi yanında Milli Hidrometeorologiya Xidməti tərəfindən quruda, yerli və tranzit çaylar, göllər, su anbarları və Xəzər dənizinin Azərbaycan sektoru da daxil olmaqla su obyektlərində fasiləsiz hidrometeoroloji müşahidələr aparılır”.
1news.az xəbər verir ki bu sözləri Azərbaycan Respublikası Ekologiya və Təbii Sərvətlər Nazirliyi yanında Milli Hidrometeorologiya Xidmətin rəisi Nazim Mahmudov Türk Dünyasının II Meteorologiya Forumunda deyib.
"Son illər ərzində hidrometeoroloji müşahidə şəbəkəsinin modernləşdirilməsinə, hidrometeoroloji müşahidələrin avtomatlaşdırılmasına başlanmışdır. 2019-cu ildən dövlət investisiya layihələri çərçivəsində müasir meteoroloji dopler radiolokatorlar, yeni nəsil avtomat hidroloji, meteoroloji və dəniz stansiyaları alınaraq quraşdırılmışdır. Həmçinin dövlət investisiyası hesabına Milli Hidrometeorologiya Xidmətində təhlükəli hava hadisələrinin idarə olunması məqsədilə Situasiya Mərkəzi yaradılıb".
N.Mahmudov deyib ki, müşahidə şəbəkəsinin avtomatlaşdırılması və Dopler radar sistemlərindən istifadə hidrometeoroloji proqnozların və təhlükəli atmosfer hadisələri barədə xəbərdarlıqların keyfiyyətinin artmasında xüsusi rol oynamışdır.
"Qeyd olunduğu kimi, artıq 20 ildən artıqdır ki, hidrometeoroloji proqnozların tərtibatında Türkiyə Respublikasının istehsalı olan Turkmetkap proqramından geniş istifadə olunur. Peyk məlumat mübadiləsi sistemi ilə hava proqnozlarının hazırlanmasında istifadə olunan faktiki məlumatlarla yanaşı çoxsaylı proqnostik xəritələr, rəqəmsal modellərin nəticələri əldə olunur, informasiya mübadiləsi aparılır".
