Bakıda məktəblərində qızılcaya görə siniflər bağlanıb? - BŞTİ-dən CAVAB
Son günlər Azərbaycanda qızılca xəstəliyi yayılmağa başlayıb. Bununla bağlı aidiyyəti qurumlar tərəfindən də məlumat yayılıb. Səhiyyə Nazirliyinin yaydığı məlumatda qeyd olunub ki, Azərbaycanın bəzi bölgələrində qızılca virusuna tək-tək yoluxma halları müşahidə edilib.
Son günlər sosial şəbəkələrdə bəzi istifadəçilər Bakıda da məktəblilər arasında qızılca xəstəliyinin kütləvi yayıldığı və buna görə də bəzi siniflərdə dərslərin ləğv olunğuğu qeyd olunub.
1news.az məsələni araşdırıb.
Bakı Şəhəri üzrə Təhsil İdarəsindən 1news.az-ın sorğusuna cavab olaraq bildirilib ki, ümumi təhsil müəssisələrində qızılca xəstəliyinin kütləvi yayılması ilə bağlı Bakı Şəhəri üzrə Təhsil İdarəsinə (BŞTİ) məlumat daxil olmayıb.
“Məktəblərdə tibbi xidmət işi yerli poliklinikalar tərəfindən təyin edilmiş tibb bacısı və ya həkim tərəfindən həyata keçirilir. Təhsil müəssisələrinə təyin edilmiş tibb bacısı və ya həkimin işinə müvafiq poliklinikalar tərəfindən nəzarət edilir.
Səhhətində narahatlıq müşahidə edilən məktəblilər tibb bacısı və ya həkim tərəfindən ilkin müayinə olunur, valideyn ilə əlaqə saxlanılır, şagirdin vəziyyətinə uyğun tədbirlərin görülməsi təmin edilir.
Valideynlərə hər zaman tövsiyə olunur ki, övladları mövsümi xəstəliklərə və virus infeksiyalarına yoluxduğu halda tam sağalanadək onların digər uşaqlarla yaxın təmasda olması məqsədəuyğun deyil”.
