Baş Prokurorluq tikintisi davam edən binalardan mənzil almaq istəyən vətəndaşlara müraciət edib

Baş Prokurorluq tikintisi davam edən binalardan mənzil almaq istəyən vətəndaşlara müraciət edib.

1news.az xəbər verir ki, müraciətdə deyilir:

"Tikintisi davam etdirilən və ya istismarına icazə verilməmiş çoxmənzilli binalardan mənzil alan zaman diqqət edilməli hallar

Tikintisi davam etdirilən və ya istismarına icazə verilməmiş çoxmənzilli binalardan mənzil alan vətəndaşlar gələcəkdə ehtimal olunan qanunpozuntuları ilə rastlaşmamaq və ya cinayətin qurbanı olmamaq üçün tikinti şirkətindən aşağıda qeyd olunan sənədləri tələb edib nəzərdən keçirə bilərlər:

- binanın yerləşdiyi torpaq sahəsi üzərində mülkiyyət, icarə və ya istifadə hüququnu təsdiq edən sənəd;

- müvafiq icra hakimiyyəti orqanı ilə razılaşdırılmış layihə;

- müvafiq icra hakimiyyəti orqanının tikilinin inşa edilməsinə icazə barədə qərarı;

- istismara qəbul aktı (qarşı tərəf binanın istismara verildiyini bildirdiyi halda);

- alqı-satqı prosesində iştirak edəcək tikinti şirkətinin vəzifəli şəxsinin şəxsiyyətini, vəzifəsini, habelə mənzil satışını həyata keçirmək səlahiyyətinə malik olmasını təsdiq edən sənədlər;

- mənzil-tikinti kooperativi (MTK) binasında yaşayış (qeyri-yaşayış) sahəsinin verilməsi barədə mənzil-tikinti kooperativi üzvlərinin ümumi yığıncağının qərarı (qanunvericiliklə nəzərdə tutulmuş pay haqqı tam ödənildikdə);

- Tikinti prosesi mərhələsindən asılı olaraq yaşayış binası və mənzilə dair digər sənədlər, habelə kommersiya sirri təşkil edən məlumatlar istisna olmaqla nizamnamə və digər təsis sənədləri".