Fazil Mustafaya sui-qəsddə təqsirləndirilən şəxslər ifadə veriblər: “Elə işlər var ki, mütləq həll olunmalıdır” | 1news.az | Xəbərlər
Cəmiyyət

Fazil Mustafaya sui-qəsddə təqsirləndirilən şəxslər ifadə veriblər: “Elə işlər var ki, mütləq həll olunmalıdır”

09:17 - 19 / 02 / 2024
Fazil Mustafaya sui-qəsddə təqsirləndirilən şəxslər ifadə veriblər: “Elə işlər var ki, mütləq həll olunmalıdır”

Millət vəkili Fazil Mustafaya qarşı sui-qəsd cəhdində ittiham olunan dəstə üzvlərinin cinayət işi üzrə məhkəmə araşdırması davam edir.

1news.az-ın “Qafqazinfo”ya istinadən məlumatına görə, müttəhimlər - Azər Səricanov, Səbuhi Şirinov, Emin Əliyarov, Rəşad Əhmədov və Elşad Əsgərov konvoyun müşayiəti ilə Bakı Ağır Cinayətlər Məhkəməsinə gətiriliblər.

İclasın əvvəlində işə Fazil Mustafanın vəkili və nümayəndəsi Əjdər Əhmədovun qoşulduğu elan edilib. Bundan sonra cinayətin əsas təşkilatçısı olduğu iddia edilən Azər Səricanov tərəflərin suallarını cavablandırıb.

Məhkəmədə Səricanovdan Fazil Mustafanı nəyə görə sivil yolla başa salmadığı, sui-qəsd cəhdinə əl atdığı soruşulub. Səricanov deyib ki, Fazil Mustafanı lap əvvəldən cəzalandırmaq fikri var imiş. Buna səbəb isə deputatın müxtəlif sosial şəbəkələrdəki çıxışları olub: “Burada mühakimə edilənlərin hamısını mən istiqamətləndirmişəm. Nə qədər cəza verirsiniz, verin. Elə işlər var ki, mütləq həll olunmalıdır”.

Fazil Mustafanın nümayəndəsi müttəhimdən müvəkkilinin hansı sözlərinin onlara təsir etdiyini soruşub.

Səricanov Fazil Mustafanın statuslarında, yutubdakı çıxışlarında İmam Hüseyni təhqir etməsinin, Aşura günündə toy etməyin düzgün olduğunu deməsinin və buna bənzər sözlər işlətməsinin onların xoşuna gəlmədiyini, buna görə də onu cəzalandırdıqlarını deyib.

Nümayəndə Fazil Mustafanın çəkilən misalların heç birini dilinə gətirmədiyini deyərək müttəhimdən mənbə göstərməsini istəyib.

“Feysbuk səhifəsində, yutubda… Çıxışlarından birində deyir ki, Məhərrəm ayında mələşmək, ulaşmaq olmaz. Mən belə sözləri qəbul edə bilmərəm”, - deyə Səricanov cavab verib.

Sadıqovun “Fazil Mustafanın siyasi kursundan məlumatlı idinizmi?” sualına isə təqsirləndirilən “Nurçu kimi tanıyıram”, - cavabını verib.

Məhkəmə tərkibinə daxil olan hakim Azər Tağıyevi maraqlandıran məsələ isə müttəhimin nəyə görə məhz İrana gedib-gələndən sonra bu cinayəti icra etməsi olub.

Təqsirləndirilən şəxs deyib ki, sui-qəsddən sonra icraçılara problem yarana bilərdi, onların ölkədən çıxışında problem yaranmasın deyə İrana gedib.

Səricanov yekun olaraq əməlindən peşman olmadığını qeyd edib: “Əməlimdən qətiyyən peşman deyiləm”.

Prosesin davamında təqsirləndirilən Rəşad Əhmədov sərbəst ifadə verib.

Əhmədov da dövlətə xəyanət, dövlət xadiminin həyatına sui-qəsd cəhdi etməkdə, həmçinin narkotik dövriyyəsində ittiham edilir. Lakin müttəhim özünü yalnız qanunsuz silah saxlamaqda təqsirli bilir.

Deyib ki, hadisədən dərhal sonra İstanbula gedib. Oradan da İrana keçib. İranda 10 gün qaldıqdan sonra isə Azərbaycana qayıdıb, bir neçə gün sonra da həbs edilib: “Mən buradakılardan ancaq Azər Səricanovu tanıyıram, digərlərini görməmişəm. Azər mənə silah vermişdi. Tapşırmışdı ki, saxlayım, lazım olanda gəlib götürəcək. Amma Azərin həbsindən sonra gözüm qorxdu. Əvvəl İstanbula, oradan da Tehrana getdim. 10 gün orada qaldım, geri qayıtdım”.

Bundan sonra təqsirləndirilən şəxsin ibtidai istintaq vaxtı verdiyi ifadəsi elan edilib.

Əhmədov istintaqda deyib ki, uşaqlıq dostu Valeh İsmayılov uzun illər əvvəl Suriyaya gedib. Orada müharibədə iştirak edib. Müharibədən sonra isə İrana köçüb, həmin vaxtdan orada yaşayıb: “Valehlə sosial şəbəkələrdə danışırdıq. Bir dəfə Qumda Valehlə görüşümüz oldu. Həmin vaxt Valehə Azər Səricanovun Fazil Mustafanı öldürmək planının olduğunu dedim. Valeh də bu işdə maraqlı oldu. Sui-qəsd cəhdinin icra edilməsi üçün mənə 30 min dollar verdi. Pulu ondan alıb Azər Səricanova verdim. Amma pulu alanda Valeh şərt qoymuşdu ki, iş alınmasa, pulu qaytarmalıyam. Tutulmasaydım, İrana qayıdıb yaşayacaqdım. Bundan başqa, Valeh mənə Azərbaycandakı strateji obyektlərin fotolarını çəkməyi tapşırdı. Mən də dediyi yerlərin şəklini çəkib atdım”.

Proses martın 1-də davam edəcək.

Qeyd edək ki, hadisə ötən ilin martında baş verib. F. Mustafa evinin önündə “Kalaşnikov” avtomatından açılan atəş nəticəsində xəsarət alıb. Dövlət Təhlükəsizliyi Xidməti (DTX) hadisəni terror aktı adlandırıb. Təqsirləndirilən şəxslərə qarşı Cinayət Məcəlləsinin bir neçə maddəsi ilə ittiham elan edilib.

Paylaş:
257

Son xəbərlər

Bakıda növbəti ümumşəhər iməciliyi keçirilib - YENİLƏNİB20 / 04 / 2024, 18:02Bakıda taxta bazarı yanır, əraziyə polislər cəlb olunub - YENİLƏNİB20 / 04 / 2024, 17:40İcma: G7-nin açıq-aşkar ayrı-seçkiliyə yol verməsi insan hüquqlarına ziddir20 / 04 / 2024, 17:25Cavanşir Məmmədov dəfn olunub - YENİLƏNİB 120 / 04 / 2024, 16:41Ceyhun Bayramov İran səfirini diplomatik fəaliyyətinin başa çatması münasibətilə qəbul edib20 / 04 / 2024, 16:39Səfir: TDT-nin əsas məqsədi türk dövlətləri arasında əlaqələrin inkişaf etdirilməsidir20 / 04 / 2024, 16:06Ceyhun Bayramov İran səfirini diplomatik fəaliyyətinin başa çatması münasibətilə qəbul edib20 / 04 / 2024, 15:47FHN tərəfindən silsilə maarifləndirmə tədbirləri keçirilib20 / 04 / 2024, 15:32Bakıda daha bir müntəzəm marşrut xətti "BakuBus"a verilib20 / 04 / 2024, 15:15Gəncədə yanan ev söndürülüb - YENİLƏNİB20 / 04 / 2024, 14:56Bakıda gömrükçülər xeyli miqdarda aksiz markasız siqaretlər aşkar ediblər20 / 04 / 2024, 14:20Dünya bazarlarında neft bahalaşıb20 / 04 / 2024, 13:49Müdafiə naziri Quru Qoşunlarının rəhbər heyəti ilə görüşüb20 / 04 / 2024, 13:35TƏBİB Cavanşir Məmmədovun ölümü ilə bağlı məlumat yayıb - YENİLƏNİB20 / 04 / 2024, 13:20Zakir Həsənov Qarabağdan çıxan Rusiya sülhməramlılarına lazımi texniki dəstəyin göstərilməsi tapşırığını verib20 / 04 / 2024, 13:03Beynəlxalq axtarışda olan daha bir şəxs Azərbaycana ekstradisiya edilib20 / 04 / 2024, 12:45FHN Lənkəranda qanunsuz tikililəri söküb20 / 04 / 2024, 12:40Sabunçuda 34 yaşlı kişi qətl edilib20 / 04 / 2024, 12:14“Həmin gün...” musiqili-poeziya gecəsində - FOTO20 / 04 / 2024, 12:00Sabah hava necə olacaq? - PROQNOZ20 / 04 / 2024, 11:53
Bütün xəbərlər