Nazir: “Rus bölməsində təhsil alan şagirdlərin ana dilini yaxşı mənimsəməsi üçün çox iş görülüb”
"Rus dilində oxumaq heç kəsə ana dilini öyrənməmək kimi bir sərbəstlik vermir".
Bu sözləri elm və təhsil naziri Emin Əmrullayev brifinqdə rus bölməsində oxuyan şagirdlərə "Azərbaycan tarixi" fənninin Azərbaycan dilində tədrisi ilə bağlı 1news.az-ın əməkdaşının suallarını cavablandırarkən deyib.
Nazir bildirib ki, Elm və Təhsil Nazirliyi üçün builki prioritetlərdən biri də növbəti illərdə rus bölmələrində Azərbaycan dilinin keyfiyyətini artırmaqdır.
"Bizim problemimiz rus dili ilə bağlı deyil, problemimiz budur ki, 15-16 yaşında bir yeniyetmə fikrini Azərbaycan dilində ifadə edə bilmir, çünki ana dilində danışa bilmir".
Nazir əlavə edib ki, tədrisi rus dilində olan məktəblərdə "Azərbaycan Tarixi fənninin tədrisinin effektiv olması ilə bağlı danışmaq üçün hələ tezdir.
"Rus bölməsində təhsil alan şagirdlərin ana dilini yaxşı mənimsəməsi üçün artıq çox iş görülüb. Həmin şagirdlər Azərbaycan dilində imtahan verəcək, gələcəkdə Azərbaycan Ordusunda xidmət edəcək və Azərbaycan dilində danışacaq. Ali təhsil almaq istəyən hər bir şəxs Azərbaycan dilini yaxşı bilməlidir.
Gördüyüm problemlərdən biri də budur ki, şagird əgər buraxılış imtahanını verə bilmirsə, o uşaq necə 9-cu sinfə qədər qiymət alıb gəlib? Bu mənada müəyyən qədər məktəb direktorları da yanaşmalarını dəyişməlidir. Biz məktəb direktorlarımıza bu sualları verməyə başlayırıq".
