ADY-də 8 Mart – Beynəlxalq Qadınlar Günü münasibətilə “Polad zəriflər” adlı tədbir keçirildi
“Azərbaycan Dəmir Yolları” QSC (ADY) 8 Mart – Beynəlxalq Qadınlar Günü münasibətilə “Polad zəriflər” adlı tədbir keçirib.
1news.az xəbər verir ki, 6 mart tarixində Azərbaycan Dəmiryol Muzeyində baş tutan tədbirdə şirkətin 100-dən çox qadın əməkdaşı və ölkəmizdə müxtəlif sahələrdə uğur qazanmış mütəxəssislər iştirak edib.
Tədbiri giriş sözü ilə açan ADY-nin Kommunikasiya departamentinin müdiri Aybəniz İsmayılova 143 illik tarixə malik Azərbaycan dəmir yollarında öz əməyi ilə seçilən qadınları təbrik edib, fəaliyyətlərində uğurlar arzulayıb. Bildirib ki, bu kimi tədbirlərin keçirilməsində əsas məqsəd qadınlara karyeralarında inamla addımlamaları üçün dəstək göstərməkdir.
Bu gün qadınlar dəmir yolu sənayesinin innovativ inkişafına mühüm töhfə verir, əməliyyat və texniki vəzifələrdən tutmuş yüksək rəhbərliyə qədər bütün strukturlarda təmsil olunurlar.
Tədbirdə çıxış edən insan resurslarının idarə edilməsi üzrə beynəlxalq ekspert Gülzar Quliyeva qadınların liderlik keyfiyyətlərindən bəhs edib və dəmiryolçu xanımların suallarını cavablandırıb.
