Dövlət Xidməti standart nümunələrin və ölçmə vasitələrinin idxalı ilə məşğul olan sahibkarlara müraciət edib

Azərbaycanda idxalçılar standart nümunələrin və ölçmə vasitələrinin tipinin təsdiqi barədə sertifikatların əldə olunması məqsədilə qanunvericiliyə uyğun olaraq tələb olunan müvafiq sənədləri tam şəkildə təqdim etməlidirlər.

1news.az xəbər verir ki, bununla bağlı İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti məlumat yayıb.

Bildirilib ki, bu ilin mayın 1-dən etibarən ölçmə vasitələrinin idxalı və ya dövriyyəsi ilə məşğul olan, o cümlədən onları istismar edən fiziki və hüquqi şəxslər standart nümunələrin və ölçmə vasitələrinin tipinin təsdiqi barədə sertifikatların əldə olunması üçün müraciətlər Keyfiyyət portalı (https://e-keyfiyyet.gov.az/) vasitəsilə qəbul olunur. Müraciətlərin elektron qaydada edilməsi idxalçılara gömrük rəsmiləşdirməsi zamanı prosedurların sürətli həyata keçirilməsi və xidmətdən qısa müddətdə yararlanmaq imkanını təmin edir:

“Bir çox hallarda xidmətdən istifadə edən idxalçılar qanunvericiliyə uyğun olaraq tələb olunan müvafiq sənədləri natamam şəkildə təqdim edirlər. Belə hallar isə öz növbəsində müvafiq icazə sənədinin verilməsində çətinliklərin və gecikmələrin yaranmasına səbəb ola bilər. Sahibkarların nəzərinə çatdırırıq ki, qanunvericiliyin tələblərinə əsasən, standart nümunələrin və ya ölçmə vasitələrinin tipinin təsdiq edilməsi məqsədilə fiziki və hüquqi şəxslər Dövlət Xidmətinə Keyfiyyət Portalı vasitəsilə ərizə ilə müraciət etməlidirlər”

Qeyd olunub ki, ərizədə standart nümunənin və ya ölçmə vasitəsinin adı, işarəsi və əsas metroloji xarakteristikaları göstərilməli və ərizəyə aşağıdakı sənədlər əlavə olunmalıdır:

- standart nümunənin və ya ölçmə vasitəsinin pasportu, istismar sənədləri, istehsalçı müəssisənin sənədlər dəsti;

- istehsalçı və ya digər xarici ölkənin dövlət qurumu tərəfindən verilən, standart nümunənin və ya ölçmə vasitəsinin tipinin təsdiqi haqqında sertifikat (olduqda);

- standart nümunənin və ya ölçmə vasitəsinin tipinin təsviri;

- standart nümunənin və ölçmə vasitəsinin yoxlama metodikası;

Sertifikatların verilməsi Bakı KOB evində ənənəvi qaydada həyata keçirilir.

Qeyd edək ki, Nazirlər Kabinetinin müvafiq Qərarı ilə təsdiq edilmiş “Verildiyi, dayandırıldığı, bərpa və ya ləğv edildiyi barədə Dövlət Gömrük Komitəsinə məlumat göndərilməli olan lisenziyaların və icazələrin Siyahısı”nın 2.15-ci bəndinə əsasən standart nümunələrin və ya ölçmə vasitələrinin tipinin təsdiq edilməsi haqqında sertifikat idxal zamanı gömrük orqanlarına təqdim olunmalıdır.