Azərbaycanda azad sahibkarlığın inkişafı - görülən işlər hədəfinə çata bilirmi? - ŞƏRH
Azərbaycanda illərlə müxtəlif istiqamətlərdə islahatlar aparılır.
Bunlardan biri də sahibkarlığın inkişafı istiqamətində aparılan islahatlarlardır. Biznes mühitinin yaxşılaşdırılması, azad sahibkarlığın təşviq edilməsi ölkəni inkişafa aparan amillərdəndir.
Bəs ölkəmizdə bu istiqamətdə hansı işlər görülür? Atılan addımlar hədəfinə çata bilirmi? Sahibkarların bu istiqamətdə təklifi nədir?
1news.az məsələ ilə bağlı Milli Məclisin deputatı və iqtisadçı ekspertin fikirlərini öyrənib.
Milli Məclisin deputatı Məzahir Əfəndiyev deyib ki, 2018-ci ildən başlayaraq Azərbaycan iqtisadiyyatında şaxələndirilmiş islahatlara geniş vüsət aldı və hökumət tərəfindən tətbiq olunan həmin yanaşmada əsas məqsəd iqtisadiyyatın zəruri istiqamətlərinin ağardılması, dayanıqlı iqtisadi inkişafın qorunmasına nail olmaq idi.
“Bununla yanaşı olaraq uzun müddət çəkən müzakirələrdən sonra Azərbaycan Parlamenti sahibkarların, eləcə də özəl iqtisadi subyektlərin hərtərəfli azad inkişafını təmin etmək məqsədilə Rəqabət Məcəlləsini qəbul etmişdir. Eyni zamanda, hər il sahibkarlıq fəaliyyəti ilə məşğul olan iqtisadi subyektlərin işinin asanlaşdırılması məqsədilə vergi qanunvericiliyində çoxlu sayda dəyişikliklər, təkmilləşmə prosesi həyata keçirilir, ictimai dinləmələr təşkil olunur.
Dövlət tərəfindən xüsusi olaraq kiçik və orta biznesin əlaqələndirilməsi və dövlət dəstəyinin göstərilməsi üçün institusional qurumlar yaradılıb və bu proses bu gün də davam etməkdədir.
Bütün bu görülmüş işlər və qarşıda nəzərdə tutulmuş tədbirlər ümumilikdə Azərbaycanda biznes mühitinin daha da yaxşılaşdırılmasına hədəflənib”.
O, bildirib ki, bu gün 4-cü sənaye inqilabının baş verdiyi bir dövrdə sahibkarlıq fəaliyyətini daha da asanlaşdırmaq, burada yeni texnologiyaların tətbiqi və innovativ startapların daha geniş vüsət alması üçün istər ali təhsil müəssisələrində, istərsə də institutsionallaşmış qurumlarda beynəlxalq təcrübə öyrənilməli, əlavə olaraq yerli və beynəlxalq bazarlara əlçatanlıq sadələşməlidir”.
İqtisadçı ekspert Eldəniz Əmirov deyib ki, 20 il əvvəlki dövrlə indiki dövr arasında müqayisə də ildən-ilə azad sahibkarlığın dövlət tərəfindən dəstəklənməsi istiqamətində xeyli inkişaf var.
“Bu həm ayrı-ayrı dövlət qurumlarının sahibkarlara olan münasibətində hiss olunur, həm sahibkarlara yönəlik dəstək alətlərinin, təşviq mexanizmlərinin artımında, eyni zamanda rəqabət mühitinin dəstəklənməsində hiss olunur” .
Ekspert deyib ki, ölkədə azad sahibkarlığın olması üçün vacib şərtlərdən biri əlverişli qanunvericilik bazasının olmasıdır.
“Bu istiqamətdə də işlər gedir. Bu ildən dövlət satınalmaları haqqında qanunun qəbul edilməsi sahibkarlıq fəaliyyətinə dəstək verən bir vasitə olaraq qiymətləndirilə bilər.
Rəqabət Məcəlləsinin qəbul olunması isə ikinci istiqamət olaraq azad sahibkarlığın dəstəklənməsi üçün çox önəmlidir. Ümumiyyətlə ölkədə sahibkarlığın inkişafı üçün son dərəcədə önəmli olan qanunvericilik bazasıdır” .
E.Əmirli bildirib ki, sahibkarlar azad, rəqabətli bir mühit, əlverişli qanunvericilik bazası istəyir.
“Bütün bunlarla yanaşı sahibkar istəyir ki, az vergi ödəsin. Amma iqtisadiyyatın özünün də zəruri tərəfləri var. Hər bir tərəf kombinə olunmuş şəkildə, vahid bir orqanizm kimi idarə olunmalıdır. Burada təkcə sahibkarın istəyi ilə hərşeyin yaradılması mümkün deyil və yaxud dövlətin istəyi ilə hərşeyin olması mümkün deyil. Burada birgə qarşılıqlı ümümi iqtisadi sistemi inkişaf etdirən şərtlər şəraitində inkişaf mümkündür.
Sahibkarlığın inkişafının dövlət tərəfindən dəstəklənməsi müxtəlif dövlət qurumları tərəfindən həyata keçirilir. Bunlardan Kiçik və Orta Biznesin İnkişafı Agentliyini göstərə bilərik ki, o yaradılarkən məhz kiçik və orta biznesin inkişafına dair dövlət siyasətinin həyata keçirilməsi məqsədi güdülmüşdü. Nəzər saldıqda bu qurumun fəaliyyətinin uğurlu olduğunu qeyd edə bilərik” .
Yazı Azərbaycan Respublikasının Medianın İnkişafı Agentliyinin maliyyə yardımı ilə “Azad sahibkarlığın və liberal iqtisadiyyatın təşviqi” mövzusunda hazırlanıb.
