Biləsuvarda Birinci Qarabağ müharibəsinin şəhidi Elbrus İsaqov dəfn edilib - YENİLƏNİB
Gəncə şəhərindəki Şəhidlər xiyabanında naməlum şəhid kimi dəfn edilmiş Birinci Qarabağ müharibəsində itkin düşmüş hesab olunan Elbrus İsaq oğlu İsaqovla Biləsuvar rayonunun 1 saylı Cəbrayıl qəsəbəsində keçirilən vida mərasimi başa çatıb.
1news.az-ın “Report”a istinadən məlumatına görə, şəhidin nəşi Biləsuvardakı 1 saylı Cəbrayıl qəsəbəsi Şəhidlər xiyabanında dəfn olunub.
Dəfn mərasimində şəhidin doğmaları, Cəbrayıl və Biləsuvar rayon İcra hakimiyyətlərinin vəzifəli şəxsləri, rayon hüquq-mühafizə orqanlarının əməkdaşları, hərbçilər və ictimaiyyət nümayəndələri iştirak ediblər.
15:30
Gəncə şəhərindəki Şəhidlər xiyabanında naməlum şəhid kimi dəfn edilmiş Birinci Qarabağ müharibəsində itkin düşmüş hesab olunan Elbrus İsaq oğlu İsaqovun meyitinin qalıqları Biləsuvar rayonu 1 saylı Cəbrayıl qəsəbəsinə gətirilib.
1news.az-ın “Report”a istinadən məlumatına görə, şəhidin nəşi qəsəbədə ailəsinə təhvil verilib.
Hazırda qəsəbədə şəhidlə vida mərasimi keçirilir.
Qeyd edək ki, Elbrus İsaq oğlu İsaqov 1966-cı il avqustun 23-də Cəbrayıl rayonunun Böyük Mərcanlı kəndində anadan olub. O, 1994-cü il fevralın 11-də Kəlbəcər rayonunun Murovdağ istiqamətində itkin düşüb.
E.İsaqov Biləsuvar rayonu 1 saylı Cəbrayıl qəsəbəsi Şəhidlər xiyabanında dəfn olunacaq.
