Azərbaycan Toxumçular Assosiasiyası fermerlərə çağırış edib
Respublika üzrə payızlıq arpa və taxıl sahələrində biçin yekunlaşmaq üzrədir. Rəsmi açıqlanan məlumata görə, ölkə üzrə taxıl zəmilərinin 77,2 faizində biçin tam başa çatıb. Sahələrdən 2 468 767 ton məhsul yığılıb, taxıl üzrə orta məhsuldarlıq 31,6 sent/ha təşkil edir
Bu barədə 1news.az-a açıqlamasında Azərbaycan Toxumçular Assosiasiyasının sədri Mədinə Əliyeva bildirib.
O deyib ki, biçindən əvvəl taxıl yığımının itkisiz və vaxtında həyata keçirilməsi, o cümlədən yanğın təhlükəsi yaradacaq halların qarşısının alınması ilə bağlı Assosiasiya tərəfindən müxtəlif maarifləndirmə tədbirləri aparılır.
M.Əliyeva bildirir ki, bəzən fermer və sahibkarlar yanlış olaraq düşünürlər ki, biçindən sonra sahələrin yandırılması torpaqda olan alaq otlarının, o cümlədən zərərverici həşəratların məhvi üçün əlverişli üsuldur.
"Sahələrdə baş verən yanğın ətraf mühitə zərər verməklə torpağın məhsuldarlığını aşağı salır, torpağın həyat qabiliyyəti zəifləyir, illər ərzində formalaşmış faydalı mikroorqanizmlər məhv olur ki, onun da bərpası üçün əlavə resurslar və uzun müddət tələb olunur. Yüksək temperaturun torpağın üst qatına sistematik təsiri humus ehtiyatını, torpaq biotasını məhv edir və nəticədə, torpağın fiziki-kimyəvi xassələri və mexaniki strukturu dəyişir. Bu səbəbdən taxıl sahələrinin biçindən sonra yandırılması yolverilməzdir", deyə M.Əliyeva bildirib.
Qeyd edək ki, Fövqəladə Hallar, Ekologiya və Təbii Sərvətlər, Kənd Təsərrüfatı nazirlikləri bununla bağlı əhaliyə birgə müraciət ediblər.
Müraciətdə bildirilib ki, ən kiçik ehtiyatsızlıq belə əhalinin ərzaq təminatı, ölkənin torpaq fondu, meşə sahələri, flora və fauna üçün ağır fəsadlarla nəticələnə bilər.
