Birinci yarımildə nağdsız valyuta bazarında aparılan əməliyyatların 81 faizi dollarda olub

Cari ilin 6 ayında nağdsız valyuta bazarında aparılmış əməliyyatların həcmi 17,8 milyard dollar ekvivalentində olub.

1news.az Azərbaycan Mərkəzi Bankının yanvar-iyun ayları üzrə “Pul Siyasəti İcmalı”na istinadən xəbər verir ki, nağdsız valyuta əməliyyatlarının 81 faizi dollarda, 19 faizi isə digər valyutalarda aparılıb. Valyuta əməliyyatlarının 28 faizi banklararası valyuta bazarında (BVB), 72 faizi isə bankdaxili valyuta bazarında (BDVB) həyata keçirilib.

Hesabat dövründə BVB-də əməliyyatların həcmi 4,9 milyard dollar (ARDNF-in və Mərkəzi Bankın əməliyyatları daxil olmaqla) ekvivalentində olub. Bu seqmentdə əməliyyatların 98 faizi dollarda aparılıb. BVB-də valyuta əməliyyatları üzrə dövriyyə əsasən “Blumberq” platformasında aparılan əməliyyatlar hesabına formalaşıb.

BDVB-də valyuta əməliyyatlarının həcmi 12,9 milyard dollar ekvivalentində olub ki, bunun da 74 faizini dollar ilə aparılan əməliyyatlar təşkil edib. BDVB-də valyuta əməliyyatlarının 92 faizi hüquqi şəxslərlə aparılan valyuta əməliyyatlarının payına düşüb.

Banklar tərəfindən nağd xarici valyutanın alqı-satqısı üzrə aparılmış əməliyyatların həcmi 2,4 milyard dollar ekvivalentində olub. Bunun 87,5 faizini dollar ilə aparılmış əməliyyatlar təşkil edib.

Altı ayda Mərkəzi Bankda ARDNF-in valyuta satışlarının həyata keçirilməsi üzrə 44 hərrac keçirilib.