Keçmiş məcburi köçkün: Düşünəndə ki, 32 ildən sonra Laçında səs verəcəm, indidən həyəcanlanıram...
“Laçında sonuncu dəfə sovet dönəmində, 1 saylı internat məktəbində müəllim işlədiyim dövrlərdə seçkilərdə iştirak etmişdim”.
1news.az xəbər verir ki, bunu “Seçki 2024” Müstəqil Media Mərkəzinə açıqlamasında Laçın sakini Tahir Bəndəliyev deyib.
“Həyat eşqilə yaşayan bir cavan idim. O zaman fərqinə varmırdıq ki, doğma el-obada, yurdda səs hüququna sahib olmaq nə deməkdir. Düşünəndə ki, 32 ildən sonra Laçında seçkilərə gedəcəm, səs verəcəm, indidən həyəcanlanıram... İnsan ailədə ilk körpəsi doğulanda hansı hissləri keçirirsə, indi həmin hissləri yaşayıram”.
O, təqaüddə olan fizika müəllimidir. Tahir müəllim deyir ki, əgər yenidən sinif otağına daxil olub dərs desəydi, bir dərs gününü Laçında seçkilər mövzusuna həsr edərdi: “Uşaqlara bu günün əhəmiyyətini, məsuliyyətini və sevincini anladardım. Bilərdilər ki, doğma yurdda öz səsindən istifadə etmək hüququ nə deməkdir”.
Tahir Bəndəliyev deyir ki, səs verəcəyi məntəqəyə öncədən baş çəkib: “Məntəqəmizi görmüşəm. Köhnə poçt ərazisində yerləşir. Mənim kimi bütün laçınlılar oraya gedib xoş xatirələrini yada salırlar. Allah bu sevinci bizə yaşadan Ali Baş Komandana cansağlığı versin. Qarabağ müharibəsində həyatını qurban verən şəhidlərimizə rəhmət, qazilərimizə can sağlığı diləyirik. Parlament seçkisi ilə bağlı Laçında keçiriləcək səsvermə gününü – sentyabrın 1-ni səbirsizliklə gözləyirik”.
