Əməkdar jurnalist: “Ölkəmizin bütün suveren ərazisində seçkilərin keçirilməsi hər bir azərbaycanlı üçün fəxrdir”

“Şuşada, Xankəndidə və azad olunmuş digər ərazilərimizdə namizədimizə səs verməyin sevincini duyuruq, fəxarətini yaşayırıq”.

1news.az xəbər verir ki, bunu “Seçki 2024” Müstəqil Media Mərkəzinə açıqlamasında Əməkdar jurnalist Flora Xəlilzadə deyib.

“Yeni formalaşacaq parlamentin üzərinə böyük məsuliyət düşür. Bundan əvvəlki parlament seçkilərində torpaqlarımız işğal altında idi, indi isə bütün ərazilərimizdə suverenliyimiz tam təmin edib. Artıq azad olunmuş ərazilərimizdə seçki məntəqələri yaradılıb. Həmin ərazilərimizdən olan seçicilər istədikləri namizədə elə öz yurdlarında səs verəcəklər. Seçilən nümayəndələr xalqa və dövlətə sadiq olmalıdırlar. Ərazi bütövlüyünü tam bərpa etmiş Azərbaycan bu ilin əvvəlində də demokratik şəkildə Prezident seçkiləri keçirdi. Ölkəmizin bütün suveren ərazisində parlament seçkilərinin keçirilməsi hər azərbaycanlı üçün fəxr olunası məqamdır”,- deyə o bildirib.

Əməkdar jurnalist qeyd edib ki, bu seçki prosesində jurnalistlərin üzərinə böyük məsuliyyət düşür.

“Media nümayəndələri məsələlərə obyektiv yanaşmalıdırlar, ağı qaradan seçməyi bacarmalıdırlar. Jurnalistlər mövcud vəziyyəti təhlil etməli, ölkəmizə qarşı qərəzli çıxış edənlərə faktlarla cavab verməyi bacarmalıdırlar. İmkan vermək lazım deyil ki, kənar qüvvələr ölkəmizə qarşı qərəzli addımlar atsınlar. Nəzərə almaq lazımdır ki, bizlər qalib ölkənin jurnalistləriyik. İnanıram ki, jurnalistlərimiz ölkəmiz üçün önəm daşıyan bu seçkini obyektiv işıqlandıracaqlar”,– deyə F.Xəlilzadə əlavə edib.