Professor Nəsiman Yaqublu dəfn edilib - YENİLƏNİB
Bakı Dövlət Universitetinin (BDU) Jurnalistika fakültəsinin Milli mətbuat tarixi kafedrasının professoru, tarix elmləri doktoru Nəsiman Yaqublu Zabrat qəsəbəsindəki qəbirstanlıqda dəfn olunub.
1news.az APA-ya istinadən xəbər verir ki, dəfn mərasimində mərhumun ailə üzvləri və yaxınları ilə yanaşı, BDU-nun professor-müəllim heyəti, ictimai xadimlər, tanınmış jurnalistlər və qələm adamları iştirak ediblər.
Qeyd edək ki, Nəsiman Yaqublu avqustun 25-də Cəbrayıl rayonu ərazisində yol qəzasında həlak olub.
Nəsiman Yaqublu uzun illər Azərbaycan Xalq Cümhuriyyəti tarixi və qurucuları barədə tədqiqatlarla məşğul olub.
Allah rəhmət eləsin!
12:50
Bakı Dövlət Universitetinin (BDU) Jurnalistika fakültəsinin Milli mətbuat tarixi kafedrasının professoru, tarix elmləri doktoru Nəsiman Yaqublu ilə vida mərasimi keçirilib.
1news.az APA-ya istinadən xəbər verir ki, mərasimdə mərhumun ailə üzvləri və yaxınları ilə yanaşı, BDU-nun professor-müəllim heyəti, ictimai xadimlər, tanınmış jurnalistlər və qələm adamları iştirak ediblər.
BDU-nun Jurnalistika fakültəsinin dekanı Vüqar Zifəroğlu qeyd edib ki, N.Yaqublu milli mətbuat tarixinin öyrənilməsində müstəsna rolu olub.
“Nəsiman müəllimin vəfatı bizim üçün böyük itkidir. Bu gözlənilməz xəbər bütün onu tanıyanları dərindən sarsıdıb”, - deyə V.Zifəroğlu bildirib.
Jurnalistika fakültəsinin Milli mətbuat tarixi kafedrasının müdiri, professor Cahangir Məmmədli bildirib ki, N.Yaqublunun vəfatı təkcə Jurnalistika fakültəsinin yox, Azərbaycan elmi üçün böyük itkidi: “O, cümhuriyyət tariximizin, Məhəmməd Əmin Rəsulzadə irsinin tədqiqi yolunda əvəzsiz işlər görüb. Onun xatirəsi daim qəlbimizdə yaşayacaq”.
Qeyd edək ki, N.Yaqublu Zabratda torpağa tapşırılacaq.
