Nigar Məmmədova: “Azərbaycanın ümumi və inklüziv strategiyası TDT tərəfindən də dəstəklənir”
“Türk dünyasının gücləndirilməsi Türk Dövlətləri Təşkilatı dövlət başçılarının Bişkekdə keçirilən 11-ci zirvə görüşünün də əsas mövzusu oldu”.
Bunu 1news.az-a açıqlamasında Milli Məclisin deputatı Nigar Məmmədova deyib.
“Ümumiyyətlə, son 15 ildə uğurlu inkişaf yolu keçən TDT çərçivəsində keçirilən bütün toplantılarda vacib qərarlar verilir və təşkilat üçün yeni uğurlu mərhələ başlayır. Bu mənada Azərbaycanın təşəbbüsü ilə cari ilin iyulunda Türk dünyasının mədəniyyət paytaxtında keçirilən Şuşa zirvəsi xüsusi qeyd olunmalıdır. Təsadüfi deyil ki, Şuşada qəbul edilən Qarabağ Bəyannaməsi Bişkek zirvəsində də alqışlandı. Təşkilatın tarixində ən ali sənədlərdən hesab olunan “Qarabağ Bəyannaməsi” türk dövlətlərinin strateji tərəfdaşlığının daha da gücləndirilməsi və kollektiv strategiyanın formalaşdırılmasını təmin edəcək”.
“Türk Dövlətləri Təşkilatının beynəlxalq məsələlərdə rolunun artmasında Azərbaycanın xüsusi rolu var” – deyə N.Məmmədova əlavə edib:
“Yeri gəlmişkən, Türk dünyasının əsas aparıcı ölkəsi olan Azərbaycanın COP29 iqlim konfransına ev sahibliyi etməsi TDT-nin də beynəlxalq nüfuzuna təsir göstərir. Təsadüfi deyil ki, ölkəmizin COP29 kimi nüfuzlu tədbirə ev sahibliyi etməsi təşkilat üzvləri tərəfindən də dəstəklənir. Sədrliyin ambisiyaların gücləndirilməsi, eləcə də ümumi və inklüziv strategiyasına dəstək ifadə olunur. Prezident İlham Əliyev də öz növbəsində TDT üzvlərinin COP29-da fəal iştirak edəcəyinə əminliyini ifadə etdi.
Bişkek zirvəsində məlum oldu ki, regionda və dünyada artan təhlükəsizlik riskləri fonunda mümkün müdaxilələr də nəzərə alınaraq müvafiq qurumlar arasında əməkdaşlıq daha da dərinləşdiriləcək.
TDT-də eyni zamanda Əfqanıstan üzrə də İşçi Qrupun yaradılması üzv dövlətlərin hansısa ölkəyə münasibətdə vahid yanaşma nümayiş etdirməsi deməkdir.
Bununla yanaşı, TDT-nin coğrafiyası da genişlənməkdədir. TDT və Afrika İttifaqı arasında əməkdaşlığın dərinləşdirilməsi bu baxımdan mühüm əhəmiyyət kəsb edir.
Beləliklə, son 15 illik fəaliyyətə nəzər salanda TDT-nin mövqelərinin gücləndiyini, XXI əsrin Türk dünyasının inkişafı əsri olması ilə bağlı perspektivlərin ilbəil artığını söyləmək mümkündür”.
