Birinci rübdə “Pensiya kalkulyatoru” elektron xidmətindən 368 min dəfə istifadə olunub
Bu ilin yanvar-mart aylarında Əmək və Əhalinin Sosial Müdafiəsi Nazirliyinin “Pensiya kalkulyatoru” elektron xidmətindən 368 min dəfə istifadə edilib.
Nazirliyin İctimaiyyətlə əlaqələr şöbəsindən 1news.az-a verilən məlumata görə, həmin elektron xidmət istifadəçiyə mövcud qanunvericilik əsasında ona yaşa görə pensiya hüququnun yaranacağı tarix, hər üç pensiya növü (yaşa, əlilliyə və ailə başçısını itirməyə görə) üzrə tələb olunan sığorta stajı və pensiya kapitalı, hazırda pensiyaçı olub-olmaması və s. barədə məlumatları əldə etmək imkanı verir.
Ölkənin vahid sosial reyestri olan e.sosial.az portalına keçid edərək, həmin elektron xidmətdən istifadə edən hər bir şəxs fərdi şəxsi hesabında toplanmış sosial sığorta kapitalı əsasında ona təyin oluna biləcək pensiya məbləğini hesablaya bilər.
2020-ci ildə istifadəyə verilmiş “Pensiya kalkulyatoru” elektron xidmətindən ötən dövrdə istifadə sayı isə 4,7 milyonu ötüb.
