Die Tageszeitung: Dağlıq Qarabağ münaqişəsinin siyasi həlli görünmür
Qafqaz üzrə mütəxəssi Uve Halbax hesab edir ki, Ermənistanla Azərbaycan arasında yeni müharibə olacağı istisna edilmir.
O, Almaniyanın “Die Tageszeitung” qəzetinə verdiyi müsahibədə bu münaqişənin postsovet məkanında, məsələn, Cənubi Osetiya ilə Gürcüstan arasındakı və ya Ukraynanın şərqindəki digər münaqişələrdən nə ilə fərqləndiyini izah edib.
Tərcüməsi “İnosmi” saytında yayımlanan həmin müsahibədən sitatları təqdim edirik.
“Ukraynanın şərqində, Donbassda toqquşmalar başlamazdan əvvəl bütün bu münaqişələr dondurulmuşdu. Lakin Dağlıq Qarabağ göstərdi ki, buna arxalanmaq olmaz. Münaqişə, məsələn, 2016-cı ilin aprelində olduğu kimi, gah qızışdı, gah dayandı. Bu dəfə də belə oldu. Atəşkəs xəttində atışmalar oldu. Buna görə də Dağlıq Qarabağdakı münaqişə dondurulmuş sayıla bilməz.
Bu münaqişənin postsovet məkanındakı digər münaqişələrdən başqa bir fərqi isə xarici qüvvələrin fərqli maraqlarının olmasıdır”- deyə, Halbax qeyd edib.
O həmçinin bildirib ki, Rusiya Ermənistanda hərbi baza saxlasa da və hər iki tərəfə silah tədarük etsə də, Abxaziya və Cənubi Osetiyadakı vəziyyətdən fərqli olaraq birbaşa Dağlıq Qarabağda iştirak etmir:
“Düşünürəm ki, Kreml bu münaqişədə daha çox neytral mövqe tutur. Bu, son eskalasiya dövründə Rusiyanın hər iki tərəfi təmkinli olmağa çağırış etməsindən də aydın görünür.
Qarabağ münaqişəsində Rusiyanın mövqeyi ABŞ və ya Fransa kimi digər Qərb oyunçularının mövqeyindən o qədər də uzaq deyil. Bu, o deməkdir ki, biz Rusiya və Qərb arasında Gürcüstan və Ukraynaya nisbətən daha az gərgin geosiyasi rəqabətlə üzləşirik”.
Türkiyənin rolundan bəhs edən ekspert qeyd edib ki, Dağlıq Qarabağla bağlı bu, konkret tərəfi dəstəkləyən yeganə xarici oyunçudur:
“Ankara açıq şəkildə Azərbaycanla tərəfini saxladı və müharibənin başlayacağı təqdirdə Azərbaycana dəstək verəcəyini bildirdi”.
Münaqişənin mümkün həlli perspektivləri barədə danışan Halbax qeyd edib ki, əvvəlcə ən pis ssenarilərin qarşısını almaq lazımdır:
“Ardıcıl olaraq tərəfləri təmkinli olmağa və müharibəyə başlamamağa çağırış edilməlidir. Bu təhlükə çox realdır.
Ancaq münaqişənin siyasi həlli, əvvəlki kimi görünmür. Tərəflər arasında ciddi ziddiyyətlər var”.
1news.az