Yevda Abramov: İsrail Azərbaycanı uzunmənzilli silahlarla təmin edəcək
Ermənistanda “İsgəndər M” raketi yoxdur. Rusiya bu cür silahları hələ ki satışa çıxarmayıb.
1news.az-ın verdiyi məlumata əsasən, bu haqda Milli Məclisin İnsan Hüquqları Komitəsinin sədr müavini, Azərbaycan-İsrail parlamentlərarası əlaqələr üzrə işçi qrupunun rəhbəri Yevda Abramov deyib.
“BMT-nin Silahlara Nəzarət Komissiyasının qaydalarına əsasən, istehsalçı ölkə digər ölkəyə 300 kilometrdən çox məsafəni qət edə bilən ballistik raket sata bilməz. “İsgəndər M” kompleksində isə bu göstərici 500 kilometrə yaxındır. Əgər Rusiya bu silahı satsa idi komissiyanın siyahısına düşərdi”, - deyə deputat bildirib.
Onun fikrincə, Rusiya bu raket kompleksini Ermənistanın Gümrü şəhərində yerləşən bazasına yerləşdirib.
“Bununla yanaşı, Azərbaycanda “İsgəndər M”-dən daha güclü silahlar var. Həmçinin bu yaxınlarda İsrail Azərbaycana bu raketləri göydə məhv etmək gücünə malik olan hava hücumundan müdafiə sistemi verəcək. Bu sistemlər artıq göndərilmək üçün hazırdır. Müdafiənin adı “dəmir dəbilqədir”. Bu sistem tor kimi raketi göydə hədəfləyir və onun yerə düşməsinə belə imkan vermir”, - deyə Yevda Abramov davam edib.
O, yaxın vaxtlarda Azərbaycan ordusunun İsrailin strateji müasir silah növləri ilə təmin olunacağını da əlavə edib.
“Bunların hərbi sirr anlayışına daxil olduğu üçün mən açıq danışmıram. Onu əlavə etmək istərdim ki, “dəmir dəbilqə” erməniləri vahiməyə salacaq”, - deyə Yevda Abramov vurğulayıb.
1news.az
