Səfir: BƏƏ cəmiyyəti Federal Milli Şura seçkilərində iştirakı milli vəzifəsi olaraq görür
Federal Milli Şuraya seçkilər Birləşmiş Ərəb Əmirliklərinin (BƏƏ) Prezidenti Zati-aliləri Şeyx Xəlifə bin Zayed Al Nahyan tərəfindən təsdiqlənmiş siyasi güc proqramının birinci mərhələsinin başlanğıcıdır. Bu, sayca 2006-cı ildən etibarən keçirilən üçüncü seçki dövrüdür.
1news.az xəbər verir ki, bu barədə BƏƏ dövlətinin Azərbaycandakı səfiri Əlahəzrət Mohamed Ahmed Alqubaisi bildirib.
O deyib ki, BƏƏ inkişaf prosesinin əsas dayaqlarından biri olan siyasi inkişaf prosesində yeni bir mərhələnin astanasındadır:
“Buna görə seçki prosesində iştirak etmək BƏƏ cəmiyyətinin ölkənin ümumi inkişaf səylərinə səmərəli töhfə vermək və övladlarının gələcəyini formalaşdırmaq inamının bariz təcəssümüdür.
Ölkədən kənarda olan vətəndaşlara səs vermək və seçki prosesində iştirak etmək üçün Federal Milli Şurada öz nümayəndələrini seçmək imkanı vermək üçün Milli Seçki Komissiyası tərəfindən 22 və 23 sentyabr 2019-cu il tarixlərində (bazar və bazar ertəsi), BƏƏ dövlətinin ölkə xaricindəki səfirliklərində, konsulluqlarında və digər diplomatik nümayəndəliklərində 118 seçki mərkəzi qurulub.
Ölkə xaricində səsvermə prosesi ilə əlaqədar əlavə məlumat almaq üçün qeyd olunan linkə daxil olmağınız xahiş olunur: https://www.uaenec.ae/ar/elections-out”.
Qeyd edək ki, BƏƏ-nin Azərbaycandakı səfirliyində də seçki məntəqəsi yaradılıb.
P.Sultanova