Çavuşoğlu: “Azərbaycan qlobal proseslərə mühüm töhfə verib”
“Azərbaycan qlobal proseslərə mühüm töhfə verib və Antalyada G20 sammiti zamanı Ankaranın mövqeyini gücləndirib”.
1news.az AZƏRTAC-a istinadla xəbər verir ki, bu fikirləri Türkiyənin xarici işlər naziri Mövlud Çavuşoğlu noyabrın 27-də Azərbaycanın xarici işlər naziri Elmar Məmmədyarovla görüşdən sonra keçirilən birgə mətbuat konfransında deyib.
Bakı-Tbilisi-Qars dəmir yolu layihəsindən bəhs edən M.Çavuşoğlu bildirib ki, Türkiyədə layihəni icra edən şirkətin üzləşdiyi hüquqi problemlə əlaqədar bir qədər yubanma oldu. Qısa vaxtda bu məsələ həllini tapacaq. Nazir bildirib ki, ölkələrimizin regionda böyük önəmi var.
Mövlud Çavuşoğlu qeyd edib ki, Azərbaycan, Türkiyə və Gürcüstan arasındakı üçtərəfli əməkdaşlıq mexanizmləri də uğurla davam etdiriləcək. Gələn il Türkiyə, Azərbaycan, Türkmənistan xarici işlər nazirlərinin görüşü də baş tutacaq.
Nazir bütün məsələlərdə, xüsusilə Ermənistan-Azərbaycan, Dağlıq Qarabağ məsələsində Türkiyənin Azərbaycanın yanında olduğunu deyib:
“Türkiyə problemin həlli məsələsinə hər zaman konstruktiv şəkildə dəstək verir”.
Cavuşoğlu onu da bildirib ki, Bakı və Ankara terrorizmin hər cür təzahür formalarına qarşı mübarizədə həmfikirdilər.
1news.az
