Azərbaycan ilə İran arasında hərbi sahədə əməkdaşlıq uğurla davam edir
Azərbaycanın müdafiə naziri Zakir Həsənov İranın ölkəmizdəki səfiri Möhsün Pakayin ilə görüşüb.
1news.az-a Müdafiə Nazirliyinin mətbuat xidmətindən bildiriblər ki, Azərbaycan-İran münasibətlərinin inkişafında dövlət başçılarının rolunun xüsusi qeyd edildiyi görüşdə bütün istiqamətlərdə olduğu kimi, hərbi sahədə də əlaqələrin uğurla davam etdiyi vurğulanıb.
Söhbət zamanı hərbi və hərbi-texniki sahələrdə əməkdaşlığın yüksək səviyyəsindən məmnunluq ifadə edilib, əlaqələrin inkişaf perspektivləri barədə ətraflı fikir mübadiləsi aparılıb.
Görüşdə Xəzər dənizində iki ölkənin Hərbi Dəniz qüvvələrinin iştirakı ilə birgə təlimlərin keçirilməsi, hərbi gəmilərin qarşılıqlı dostluq səfərlərinin, müxtəlif istiqamətlərdə ekspertlərdən ibarət işçi görüşlərinin təşkili, təcrübə mübadiləsi məsələlərinə də diqqət yetirilib.
Görüşdə İran İslam Respublikasının Silahlı Qüvvələrinin ölkəmizdəki hərbi attaşesi polkovnik Əmir Fərəci Moez də iştirak edib.
1news.az
