"Qərbi Avropada müsəlman icmaları: Fransa və Almaniya nümunəsində" analitik hesabatı dərc olub
Azərbaycan Respublikasının Prezidenti yanında Strateji Araşdırmalar Mərkəzinin "SAM-ın şərhləri" adlanan dövri nəşrinin 2015-ci il üçün növbəti sayı çap edilib.
1news.az SAM-ın mətbuat xidmətinə istinadən xəbər verir ki, bu dövri nəşrin mövzusu müasir dövrdə Azərbaycan Respublikasının Prezidenti İlham Əliyevin diqqət mərkəzində olan, polietnik və çoxkonfessiyalı ölkələrdə tarixən formalaşmış birgəyaşayış ənənəsi kimi multikulturalizm modelinin hazırda Qərb ölkələrində onun üzləşdiyi böhran kontekstində araşdırılmasına həsr olunub.
Araşdırmanın müəllifləri SAM-ın Daxili siyasətin təhlili şöbəsinin müdiri, fəlsəfə üzrə elmlər doktoru Tahirə Allahyarova və məsləhətçi-ekspert Lalə Novruzovadır.
Tədqiqatın aparılması məqsədi ilə Avropanın aparıcı dövlətlərinə - Fransa və Almaniyaya elmi ezamiyyət təşkil edilmiş, bu ölkələrdə müsəlman icmalarının formalaşması, inkişafı və hazırkı vəziyyəti təhlil edilib. Təhlilin əsasını Avropanın iki aparıcı ölkəsində yaşayan, müxtəlif ictimai-siyasi təsisatlarda təmsil olunan 13 etnik-dini müsəlman icmasının nümayəndələri (rəhbər şəxsləri və təmsilçiləri) ilə demokratik dəyərlərin sistemli böhranı, onun səbəbləri və vəziyyətdən çıxış yolları haqqında müsahibələr nəticəsində əldə edilmiş qənaətlər təşkil etmişdir.
