Elmar Məmmədyarov Bakıda səfərdə olan yunanıstanlı həmkarı ilə görüşüb
Xarici işlər naziri Elmar Məmmədyarov yunanıstanlı həmkarı Nikos Kotziasla görüşüb.
1news.az-ın məlumatına görə, görüşdən sonra nazirlər birgə mətbuat konfransı keçiriblər.
Azərbaycanın XİN rəhbəri E.Məmmədyarov bldirib ki, Prezident İlham Əliyev Yunanıstanın xarici işlər naziri N.Kotzisi qəbul edib. Sonra XİN-də görüş olub:
“Təkbətək və geniş tərkibli görüş zamanı ikitərəfli əməkdaşlığın inkişafı, Dağlıq Qarabağ münaqişəsinin nizamlanması, Avropada miqrasiya böhranı, Azərbaycan-Avropa İttifaqı əməkdaşlığı, həmçinin energetika sahəsində əməkdaşlıq məsələləri ətrafında müzakirələr apardıq”.
Beynəlxalq təşkilatlarda iki ölkə arasında əməkdaşlığın genişləndirilməsinə dair razılıq əldə olunduğunu deyən E.Məmmədyarovun sözlərinə görə, enerji məsələləri də danışıqların əsas müzakirə mövzularındfan olub:
“Azərbaycan enerji sahəsində Yunanıstanla əməkdaşlıq edir. Məlum olduğu kimi, Transadriatik boru kəməri Yunanıstanın ərazisindən keçəcək”.
E.Məmmədyarov Rusiya ilə Türkiyə arasında baş verən son hadisələrə də toxunub:
“İki ölkə arasında baş verən son hadisələrdən narahatıq. Həm Türkiyə, həm də Rusiya ilə strateji əlaqələrimiz var, ən böyük ticarət tərəfdaşlarımızdır. Azərbaycan səylər göstərir ki, bu böhrandan çıxış yolu tapaq”.
Yunanıstanın xarici işlər naziri N.Kotzis də Azərbaycanla əlaqələrə önəm verdiklərini deyib:
“Azərbaycanda ilk səfərimdir. Bakıda olmağıma çox şadam. Yunanıstan həm coğrafi, həm də mədəni baxımdan Azərbaycanın tərəfdaşıdır”.
N.Kotzis Azərbaycan qazının Yunanıstan üçün böyük önəm kəsb etdiyini xüsusi vurğulayıb:
“Enerji dəhlizi baxımından çox həssas bir yerdə yerləşirik. Ümidvaram ki, növbəti iki ildə Azərbaycanın qazını ala və Avropaya ötürə biləcəyik”.
1news.az
