Azərbaycan ombudsmanı Meksikanın ölkəmizdəki səfiri ilə görüşüb

Azərbaycan Respublikasının İnsan Hüquqları üzrə Müvəkkili Elmira Süleymanova Meksikanın ölkəmizə təyin edilmiş səfiri Rodrigo Labardini ilə görüşüb.

Ombudsman Aparatının mətbuat xidmətindən 1news.az-a bildiriblər ki, görüşdə səfirə Ombudsman təsisatının çoxşaxəli fəaliyyəti haqqında məlumat verilib. Dövlət qurumları və vətəndaş cəmiyyəti, QHT-lərlə yanaşı, beynəlxalq təşkilatlarla insan hüquqları sahəsində səmərəli əməkdaşlıq əlaqələrinin qurulduğu qeyd edib.

Müvəkkil dövlətimizin başçısının 27 dekabr 2011-ci il tarixli Sərəncamı ilə Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramının təsdiq edildiyini diqqətə çatdırıb. Uğurla həyata keçirilən bu mühüm sənədin insan hüquqlarının müdafiəsi və təmin olunması üçün böyük imkanlar açdığını vurğulayıb. Ombudsman bu proqramın icrası ilə bağlı respublikanın bütün rayonlarında ictimai dinləmələrin keçirildiyini bildirib.

Azərbaycan Prezidenti tərəfindən son illərdə 60 əfv fərmanın imzalandığını deyən E.Süleymanova söyləyib ki, Milli Məclis isə 10 amnistiya aktını təsdiqləyib.

Səfir Azərbaycan Ombudsmanı ilə Meksika Ombudsmanı arasında əməkdaşlığın önəmli olduğunu qeyd edib. Diplomat Ombudsmanın insan hüquqları sahəsində çoxşaxəli, uğurlu fəaliyyət göstərdiyini vurğulayıb, təsisatla qarşılıqlı əməkdaşlıqda maraqlı olduğunu bir daha diqqətə çatdırıb.

1news.az