İsveç XİN başçısı: "İsveç Dağlıq Qarabağ münaqişəsinin həllinə köməklik göstərməyə hazırdır"

"İsveç Dağlıq Qarabağ münaqişəsinin danışıqlar yoluyla siyasi həllini və danışıqların ATƏT-in Minsk qrupunun çərçivəsində aparılmasını dəstəkləyir".

1news.az xəbər verir ki, bunu İsveçin xarici işlər naziri Marqot Vallstrem Bakıda Azərbaycanın XİN başçısı Elmar Məmmədyarovla birgə keçirdiyi mətbuat konfransında deyib.

"Dağlıq Qarabağ münaqişəsinin həlli Azərbaycan üçün vacib məsələdir. ATƏT-in Minsk qrupunun həmsədrləri sayəsində yüksək səviyyədə müzakirələrin aparılmasını dəstəkləyirik. Azərbaycanlı həmkarımdan bu münaqişənin həllində İsveçin nə edə biləcəyi ilə maraqlandım. Biz bu məsələdə iştirak etməyə hazırıq. Prosesin əsas iştirakçısı həmsədrlərdir. Lakin münaqişənin sülh yolu həlli üçün iş görməliyik. Beynəlxalq hüququn ərazi bütövlüyü, zorakılığın artmaması və xalqların öz müqəddəratının təyin etməsi kimi prinsipləri nəzərə alınmaqla, problemin həllinə nail olmalıyıq.Güc tətbiq etməmək, sərhədlərin toxunulmazlığı və xalqların öz müqəddəratını müəyyən etmək prinsiplərinə riayət etmək lazımdır. Münaqişənin həlli üçün daha geniş formatda görüş keçirilməsinə ehtiyac yaranarsa, biz ATƏT-in Minsk qrupunun üzvü kimi bu görüşdə iştirak etməyə hazırıq ", - deyə Marqot Vallstrem bildirib.

1news.az