Novruz Məmmədov: “Terror aktlarının beynəlxalq aləmdəki gərginliklə bağlılığını sübut etməyə ehtiyac yoxdur”
“Terror aktlarının beynəlxalq aləmdəki gərginliklə bağlılığını sübut etməyə ehtiyac yoxdur”.
1news.az-ın verdiyi xəbərə görə, bu sözləri Prezident Administrasiyasının Xarici əlaqələr şöbəsinin müdiri Novruz Məmmədov Twitter səhifəsində yazıb:
“Düşünürəm ki, dövlətlərarası gərginlik azalarsa terror aktlarının azalması da müşahidə olunar.”
N.Məmmədov terror aktı nəticəsində həlak olanların ailələrinə başsağlığı verib.
“Ankarada terror hadisəsi nəticəsində həyatını itirən insanlara Allah rəhmət eləsin, yaxınlarına səbir, dözüm versin!”
Qeyd edək ki, dünən Türkiyənin paytaxtı Ankarada güclü partlayış baş verib. Partlayış Türkiyə Böyük Millət Məclisindən 500 metr məsafədə, Türkiyənin Baş Qərargahı, hərbçilər üçün yataqxana və parlament binasının yaxınlığında baş verib.
Partlayışın səbəbi minalanmış avtomobil olub. Türkiyə Baş Qərargahı partlayışı terror aktı adlandırıb. Ölkənin baş nazir müavini Numan Kurtulmuş Ankarada baş verən partlayış nəticəsində 28 nəfərin öldüyü, 61 nəfərin yaralandığı barədə açıqlama verib.
Terror aktının əsas qurbanları hərbçilər olub, hadisə yerində olan Ankara sakinləri isə xəsarət alıb.
1news.az
