Külli miqdarda narkotik vasitə qanunsuz dövriyyədən çıxarılıb
Sumqayıt Şəhər Polis İdarəsi əməkdaşlarının ötən gün narkotiklərin qanunsuz dövriyyəsinə qarşı mübarizə istiqamətində keçirdikləri əməliyyat tədbirləri nəticəsində bu qanunazidd əməllə məşğul olan şəxslər məsuliyyətə cəlb ediliblər.
1news.az-ın Daxili İşlər Nazirliyinin mətbuat xidmətinə istinadən verdiyi xəbərə görə, əməliyyat nəticəsində külli miqdarda narkotik vasitə qanunsuz dövriyyədən çıxarılıb.
Polis əməkdaşları tərəfindən şübhəli bilinən üç nəfər saxlanılıb. Araşdırmalar zamanı onların şəhər sakinləri Rəşad İsrafilov, əvvəllər məhkum edilən Sabir Novruzov və Yalçın Məmmədov olduqları müəyyənləşib.
Həmin şəxslərin üzərlərinə baxış zamanı onlardan narkotik vasitə olan marixuana götürülüb.
Ekspertizaya təqdim olunan həmin narkotik vasitələrin ümumi çəkisi 1 kiloqram 270 qram təşkil edilib. R.İsrafilovdan 440 qram, S.Novruzovdan 440 qram və Y.Məmmədovdan 390 qram marixuana olması barədə rəy verilib.
Saxlanılan şəxslər maddi sübutlarla birgə istintaqa təhvil veriliblər.
Faktla bağlı Cinayət Məcəlləsinin müvafiq maddəsi ilə cinayət işi başlanılıb, istintaq aparılır.
1news.az
