“YAŞAT” Fondunun rəhbəri Elvin Hüseynov kimdir - DOSYE

Məlum olduğu kimi, Qarabağ qazisi Elvin Hüseynov Azərbaycan Respublikasının ərazi bütövlüyünün müdafiəsi ilə əlaqədar yaralananların və şəhid ailələrinin təminatına dəstək fonduna ("YAŞAT" Fondu) rəhbər təyin edilib.

E.Hüseynov haqqında məlumatı təqdim edirik.

Hüseynov Elvin Akif oğlu 28 dekabr 1984-cü ildə Salyan şəhərində anadan olub.

1999-2002-ci illərdə Cəmşid Naxçıvanski adına Hərbi Liseydə, 2002-2006-cı illərdə isə Heydər Əliyev adına Azərbaycan Ali Hərbi Məktəbində təhsil alıb.

2006-2007-ci illərdə Silahlı Qüvvələrin Təlim və Tədris Mərkəzində Zabit İxtisas Kursunu müvəffəqiyyətlə bitirib.

2007-2010-cu illərdə müxtəlif hərbi hissələrdə, 2010-2016-cı illərdə isə Xüsusi Təyinatlı Qüvvələrdə hərbi xidmətini davam etdirib.

Azərbaycan Respublikasının ərazi bütövlüyünün müdafiəsi ilə əlaqədar xüsusi döyüş əməliyyatlarını yerinə yetirərkən 2 dəfə yaralanıb.

Azərbaycan Respublikasının Prezidentinin Sərəncamı ilə “İgidliyə görə”,  eyni zamanda xidməti fəaliyyəti dövründə digər medallarla təltif edilib.

2017-ci il oktyabr ayından Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyində çalışır.

Ehtiyatda olan kapitan, Qarabağ qazisidir.

Ailəlidir, 3 övladı var.

1news.az