“Laborator araşdırmalar da göstərir ki, Çin istehsalı olan Sinovak vaksini etibarlıdır” - Məlahət İbrahimqızı
“Bir ildən artıqdır ki, dünya koronavirus pandemiyası ilə mübarizə aparır. Beynəlxalq əməkdaşlıq çərçivəsində bu pandemiyadan qurtulmaq, qlobal təhlükəni aradan qaldırmaq üçün müəyyən səylər göstərilir”.
Bunu 1news.az-a açıqlamasında Milli Məclisin səhiyyə komitəsinin üzvü, deputat Məlahət İbrahimqızı deyib:
“Çox təəssüf ki, dünyanın inkişaf etmiş ölkələri bu problemi öz sərhədləri çərçivəsində həll etməyə çalışır. Hansısa ölkənin sərhədləri çərçivəsində bu problem həll olunsa belə, bu, problemin tam həlli üçün yetərli deyil. Dünyanın zəngin, inkişaf etmiş ölkələri çox çətinliklər çəkən ölkələrin problemlərinə, pandemiya ilə mübarizəsinə çoz az dəstək verir. Qlobal əməkdaşlıqdan söhbət gedirsə, BMT-də qəbul olunan sənədlərdə göstərildiyi kimi, dünyanın 2030-cu il gündəliyindən söhbət gedirsə, bunlar bir-birinə tamamilə ziddir”.
Deputat qeyed edib ki, vaksin istehsal edən şirkətlərin əksəriyyəti vaksinləri inkişaf etmiş ölkələr arasında paylayır:
“Afrika və Asiyanın iqtisadi cəhətdən zəif ölkələri hələ də vaksin gözləyirlər. Azərbaycan möhtərəm Prezidentimizin rəhbərliyi ilə Azərbaycan daxilində koronavirusa qarşı çox effektiv və uğurlu mübarizə aparır, artıq vaksinasiya mərhələsindəyik. Eyni zamanda Prezidentimizin tapşırığı və dəstəyi ilə dünyanın bir çox imkansız ölkələrinə Qoşulmama Hərəkatı və İslam Əməkdaşlığı çərçivəsində, bütövlükdə BMT çərçivəsində müəyyən yardımlar edib. Azərbaycan 40-a yaxın ölkəyə koronavirus pandemiyası ilə mübarizədə yardım edib".
"Azərbaycanda vaksinin bölgüsünün də ədalətli şəkildə aparıldığını deyən M.İbrahimqızının sözlərinə görə, vaksinasiya elmi olaraq bütün epidemioloji şərtlər nəzərə alınmaqla həyata keçirilir:
"Vaksinasiya piramida şəklində, xüsusi alqoritmlərlə həyata keçirilir. İlk növbədə risk qrupunda olan əhali vaksinasiya olundu. Ən əsas risk qruplarından tibb işçilərinin vaksinasiyası aparıldı, hazırda da yaşı 65-dən yuxarı olan şəxslər vaksinasiya olunur. Bütün məsələlər Prezidentimizin diqqəti əsasında çox uğurla həyata keçirilir. Dünyanın bir çox inkişaf etmiş dövlətləri pandemiya ilə mübarizədə böyük çətinliklərlər qarşılaşdı, xəstəxanalarda yerlər olmadı, ölənlərin sayı sürətlə artdı. Amma Azərbaycanda bu günə qədər elə ciddi bir problem olmayıb. İnanıram ki, cənab Prezidentin rəhbərliyi ilə 44 günlük Vətən müharibəsində olduğu kimi koronavirusla müharizədə də qələbə qazanacağıq”.
Deputat Çin istehsalı olan vaksinlə bağlı da fikirlərini bölüşüb:
“Mən vaksin üzrə mütəxəssis deyiləm, amma pediatram. Pediatrlar vaksinasiya işini çox yaxşı bilir. Çünki vaksinasiya bütün dünyada əsasən uşaq yaşlarında həyata keçirilir. Ona görə də universitetlərlə pediatrlara vaksinlə bağlı dərslər tədris olunur. Ən yaxşı vaksinlər inaktiv olanlardı. O da həmin xəstəliyin zəiflədilmiş halıdır. Bu günə qədər bir çox xəstəliyin qarşısının alınmasında vaksinlərdən istifadə olunub. Bunların hamısının da təsiri olub. Çin istehsalı olan vaksin də həmin xəstəliyin zəiflədilmiş virusudur, bu da çox effektivdir. Dünyanın bir çox ölkələri bu vaksindən istifadə edir, laborator araşdırmalar da göstərir ki, Çin istehsalı olan Sinovak vaksini etibarlıdır”.
M.İbrahimqızı vaksinlərin istifadəsinin çox vacib olduğunu da vurğulayıb:
“Vaksinasiya xüsusi risk qrupları və müəyyən yaş qrupları üçün vacibdir. Çünki müəyyən yaş qrupunda olanlar xəstəliyi çox ağır keçirirlər. Qeyd etdiyim kimi Azərbaycanda vaksin bölgüsü ədalətli aparılır. Mənim özümə də növbəm çatanda vaksin vurduracağam”.
Qafar Ağayev