“Ramazan ayı və koronavirus pandemiyası” - “Çıxışa doğru”da MÜZAKİRƏ
Ramazan ayı axşamlar yeyilən yemək “iftar” adlanır və iftarı su və xurma ilə açmaq lazımdır.
Koronavirus pandemiyası dövründə inanclı insanların qələbəlik süfrələrindən uzaq olmaları, iftarı sadəcə ailə arasında keçirmələri və kütləvi namazlarda iştirak etməmələri tövsiyə olunur.
Oruc özlüyündə orqanizm üçün kifayət qədər ciddi sınaq olduğu, bu zaman immunitet zəiflədiyi üçün sosial şəbəkələrdə bu il ümumiyyətlə oruc tutmağa lüzum varmı sualı ətrafında mübahisələr gedir. Amma dini liderlər orucluğu “təxirə salmayıb”, sadəcə bu zaman sağlamlığı da unutmaq lazım olmadığı haqda xəbərdarlıq ediblər. Quranda da yalnız sağlamlıq imkan verdiyi zaman, insan özünə ziyan vurmadan oruc tutmalı olduğu haqda deyilib. Xəstələrə və orqanizmi zəif olanlara, həmçinin hamilə qadınlara və süd verən analara oruc tutmaq məsləhət deyil.
1News-un məlumatına görə, AzTV-nin “Çıxışa doğru” verilişində “Ramazan ayı və koronavirus pandemiyası” mövzusunda aparılan müzakirələr zamanı bu barədə ətraflı danışılıb. Verilişin qonaqları – Milli Məclisin deputatı Ceyhun Məmmədov, 1 nömrəli şəhər poliklinikasının baş həkimi Kübra Cabbarova və sosioloq Zəminə Səfərova mövzu ətrafında müzakirə aparıblar.
“Çıxışa doğru” verilişini bütöv şəkildə Azərbaycan Televiziyasının “YouTube” kanalından izləyə bilərsiniz: