Naqif Həmzəyev: “Azərbaycan NATO ilə birbaşa əməkdaşlıq edir”
Azərbaycan Respublikası 4 may 1994-cü il tarixində NATO-nun “Sülh Naminə Tərəfdaşlıq” (SNT) Proqramına qoşulub. Bəs bu illər ərzində Azərbaycan və NATO münasibətlərində hansı irəliləyişlər olub?
Məsələ ilə bağlı 1news.az-a danışan Milli Məclisin deputatı Naqif Həmzəyev bildirib ki, Azərbaycan hər zaman sülhün tərəfdarı olub:
“NATO ilə də əsas məqsəd sülhməramlı missiyalarda iştirak etmək, NATO-dan öyrənmək, region ölkələrində və yaxud münaqişə olan ərazilərdə sülhməramlı missiyalarda yaxından iştirak etməkdir. Unutmamalıyıq ki, Azərbaycan həm İraqda, həm də Əfqanıstanda sülhməramlı missiyalarda təmsil olunub. Azərbaycan sülhməramlıları bu missiyaları uğurla həyata keçiriblər. Həmçinin NATO ölkəsi olan Türkiyə ilə Azərbaycan hərtərəfli strateji əməkdaşlıq edir. Türkiyənin gücü hər kəsə bəllidir, NATO-da da ilk sıralardan birini tutur. Azərbaycan həm NATO ilə birbaşa əməkdaşlıq edir, həmçinin NATO ölkəsi olan Türkiyə ilə yaxından əməkdaşlıq edir. Türkiyənin hərbi sənayesinin inkişafı, hərbi gücü onu deməyə imkan verir ki, Azərbaycan Türkiyədən və NATO-dan çox faydalana bilib”.
Deputat qeyd edib ki, 44 günlük Vətən müharibəsində də Azərbaycan regionda 27 ilə yaxın müddət ərzində beynəlxalq təşkilatların həyata keçirə bilmədikləri işi etdi:
“Azərbaycan bununla da regiona sülhü gətirmək üçün Qarabağın işğal altında olan ərazilərindən erməni faşistlərini və terrorçularını təmizlədi. Azərbaycanın NATO tərkibindəki fəaliyyəti ABŞ dövlət katibi tərəfindən də müsbət qiymətləndirildi. Düşünürəm ki, gələcəkdə də NATO və Azərbaycan arasında əməkdaşlıq davam edəcək”.
