Xalq artisti Arif Quliyev vəfat edib
Xalq artisti Arif Quliyev dünyasını dəyişib.
1news.az-ın məlumatına görə, bu barədə onun yaxınları sosial şəbəkələrdə bildiriblər.
Xatırladaq ki, xalq artisti bir müddət idi ki koronavirus səbəbindən xəstəxanada müalicə alırdı.
Arif Əli oğlu Quliyev 16 may 1950-ci ildə Əli-Bayramlı şəhərində doğulub. 965-ci ildə Bakı Mədəni-Maarif Texnikumunun "Dram və kino aktyorluğu" fakültəsinə daxil olub. 1968-ci ildə texnikumu bitirib, Mingəçevir Dövlət Dram Teatrına təyinatla işləməyə göndərilib. 1973-cü ildə Azərbaycan Dövlət İncəsənət İnstitutunun Musiqili komediya aktyorluğu fakültəsinə daxil olub. 1975-ci ildə Musiqili Komediya Teatrına dəvət edilmişdir. 1979-cu ildə o, İncəsənət İnstitutunu bitirib.
Müxtəlif səpgili və müxtəlif xarakterli obrazlar yaratmışdır. Teatr səhnəsində ifa etdiyi Şərbətəli (S.Dağlı, C.Cahangirov, "Təzə gəlin"), Salyanski (F.Əmirov, M.Əlizadə, "Gözün aydın"), Əli (M.Şamxalov, Z.Bağırov, "Qaynana"), Dursun (S.Rüstəmov, S.Rüstəmov, "Durna"), Mürsəl (S.Ələsgərov, S.Qədirzadə, "Gurultulu məhəbbət"), İbişov (Ş.Qurbanov, S.Ələsgərov, "Özümüz bilərik"), Dursunov (S.Rəhman, E.Sabitoğlu, "Hicran"), Tofiq (Ş.Axundova, N.Gəncəli, "Ev bizim, sirr bizim"), Hambal (Ü.Hacıbəyov, "Məşədi İbad"), Mirzəqulu (Hidayət, "Durnalar qayıdanda"), Səbzəli (M.Haqverdiyev, "Məhəbbət, şeytan və ağ ölüm") kimi obrazlar komediya janrında yaratdığı uğurlu rollardan bir qismidir.
Yaradıcılığında Azərbaycan Televiziyası da geniş yer tutur. Onun "Şans", "Bığ əhvalatı", "Qaynana", "Lift əhvalatı", "Yarım ştat", "Evləri köndələn yar" və başqa teletamaşalarda oynadığı rollar tamaşaçıların rəğbətini qazanmışdır. "Bəyin oğurlanması", "Yaramaz", "Bəxt üzüyü", "O dünyadan salam", "Qəm pəncərəsi", "Mənim ağ şəhərim", "Alma almaya bənzər", "Ağ gəmi" bədii filmlərdəki obrazları yaradıcılıq potensialının zənginliyini ifadə edir.
İrəvan Dövlət Azərbaycan Dram Teatrında işləyirdi. 1988-ci ildən Özəl Satira Teatrının bədii rəhbəri idi.
1982-ci ildə o, Respublika Gənclər mükafatına, 1989-cu ildə Əməkdar artist fəxri adına, 1993-cü ildə isə "Humay" mükafatına layiq görülüb.
1993-cü ildə Musiqili Komediya Teatrından Milli Dram Teatrına dəvət olunmuşdur. Elə həmin il Xalq artisti fəxri adına layiq görülmüşdür. 2006-cı ildə teatrdakı qazandığı uğurlara görə "Qızıl Dərviş", 2012-ci ildə "Zirvə" mükafatına, 2014-cü ildə sənətkar medalına layiq görülmüşdür. Prezident təqaüdçüsüdür.
Arif Quliyev İşgüzar adamlar, Evləri köndələn yar, Eksperiment, Layiqli namizəd
100 filmi, Cazibə qüvvəsi, Əbədi mühərrik,
Bəyin oğurlanması, Qəm pəncərəsi, Yay gününün xəzan yarpaqları, Sehrli çıraq,
Yaramaz, Güzgü, Bəxt üzüyü,
777 №-li iş, O dünyadan salam,
Mənim ağ şəhərim, Yarımştat, Bakı oğrusu, Olacağa çarə yoxdur, Şans, Adam ol! 2, Adam ol! 3, Qoy oturmuşuq, Halal pullar, Evləri göydələn yar, Bığ əhvalatı, Axırıncı dayanacaq, Qız atası teleserialı, Dörd yoldaş və qardaş Bəxt üzüyü 2 filmlərdə rol alıb.
Allah rəhmət eləsin!
