Avtomobillərə vurulan yapışqan loqolar, yazılar sökülür - Yol polisi və ekspertdən AÇIQLAMA
Sosial şəbəkələrdə paytaxt Bakıda üzərində loqo, reklam olan avtomobillərə qarşı reyd keçirilməsi ilə bağlı məlumat yayılıb.
1news.az xəbər verir ki, sosial şəbəkə istifadəçilərinin yazdığına görə, yol polisi əməkdaşları tərəfindən paytaxtın bəzi ərazilərində üzərində loqo olan avtomobillər saxlanılaraq yapışqan loqolar və yazılar sökülür.
Məsələ ilə bağlı 1news.az-a danışan Bakı Şəhər Dövlət Yol Polisi İdarəsinin ictimaiyyətlə əlaqələr şöbəsinin rəisi, polkovnik Vaqif Əsədov bildirib ki, idarə edilən nəqliyyat vasitələri qanunvericiliyin tələblərinə uyğun olmalıdır.
“Əgər reklam haqqında qanunun tələbi pozulursa, o zaman qanun nə tələb edirsə ona uyğun addım atılmalıdır. Bu məsələni də müzakirəyə ehtiyac qalmır. Vətəndaşın idarə etdiyi nəqliyyat vasitəsinin üzərində hər hansı reklam varsa, onu qeydiyyatdan keçirmək üçün mütləq müraciət etməlidir. Belə sürücülər yol polisi tərəfindən saxlanılırsa, deməli qanunun tələblərinə uyğundur. Sosial şəbəkələrdə sanki yol polisi özbaşınalıq edirmiş kimi fikirlər səsləndirmək yolverilməzdir. Birmənalı olaraq, sürücülər bilməlidir ki, avtomobillərinin üzərində sonradan yerləşdirilən reklam və ya başqa nəsə quraşdırılırsa, mütləq qeydiyyatdan keçirmək üçün müraciət etməlidir. Qanunvericilikdə reklam haqqında qanunun pozulmasına görə cərimə də nəzərdə tutulur”.
Nəqliyyat üzrə ekspert Elməddin Muradlı deyib ki, avtomobillərin üzərində neqativ yapışqanlar, əxlaqsızlığı yayan yazılar varsa, onlar sökülməlidir.
“Ötən gün bir avtomobil var idi, üzərində porno reklamı var idi, o tipli yapışqanların, yazıların avtomobillərin üzərindən çıxarılması vacibdir. Amma müəyyən avtomobil klubunun loqosudursa, onu yığışdırmağa ehtiyac yoxdur. Reklamla bağlı qanun var, reklam nədir, reklamın ölçüsü necə olmalıdır, hansı hallarda reklam sayılır. Hansısa avtomobil klubunun kiçik bir loqosunu vurmaq reklam sayılmır”.
Xatırladaq ki, i, ötən gün Bakı küçələrində porno saytın təbliğatını aparan "Ford Mustang" markalı nəqliyyat vasitəsinin fotosu yayılıb. Belə ki, 10 FY 630 dövlət qeydiyyat nişanlı nəqliyyat vasitəsinin arxa şüşəsinin üzərində "Pornhub" yazılması, sosial şəbəkərlə müzakirəyə çıxarılıb.