Azərbaycan paralimpiyaçıları Gürcüstanda təlim-məşq toplantısında iştirak edəcəklər
Azərbaycan Respublikası Milli Paralimpiya Komitəsinin pauerliftinq idman növü üzrə milli komandasının üzvləri baş məşqçi İlqar İbişovun rəhbərliyi altında 15 iyul - 04 avqust 2021-ci il tarixlərində Gürcüstanın Bakuriani şəhərində keçirilən beynəlxalq təlim-məşq toplantısında iştirak etmək üçün yola düşüblər.
1news.az xəbər verir ki, təlim-məşq toplantısı Tokio 2020 Yay Paralimpiya Oyunlarına hazırlıq məqsədi daşıyır.
Nəzərinizə çatdırırıq ki, 4 pauerlifterçi Tokio 2020-də ölkəmizi təmsil edəcəklər :
Pərvin Məmmədov (-49 kq)
Nurlan Babacanov (-97 kq)
Elşən Hüseynov (-107 kq)
Şamo Aslanov (+107 kq)
Ümumilikdə Azərbaycan Milli Paralimpiya komandası bu günə 6 idman növündən 34 lisenziya qazanıb. 11-i cüdo, 10-u atletika, 4-ü parataekvando, 4-ü pauerliftinq, 3-ü üzgüçülük və 2-si güllə atıcılığı növündəndir. Azərbaycan Paralimpiya tarixində bu rekord göstəricidir.
Təlim-məşq toplantısı Azərbaycan Respublikası Əmək və Əhalinin Sosial Müdafiəsi Nazirliyi tabeyliyində Sosial Xidmətlər Agentliyinin dəstəyi ilə həyata keçirilir.
