Poliklinikanın maska taxmayan işçisi işdən çıxarıldı – VİDEO – YENİLƏNİB
Sumqayıt şəhər 3 saylı poliklinikada tibbi maskadan istifadə etməyən qeydiyyatçı işdən çıxarılıb.
1news.az-ın Trend-ə istinadla verdiyi xəbərə görə, bu barədə Tibbi Ərazi Bölmələrinin İdarəetmə Birliyindən (TƏBİB) məlumat verilib.
Videomaterialda qeyd olunan məsələ tərəfimizdən araşdırılıb. Araşdırma nəticəsində maska taxmaqla bağlı qaydaya riayət etmədiyi aşkar olunan qeydiyyatçı töhmət verilərək, işdən azad edilib. Bir daha bildiririk, pandemiya ilə mübarizə tədbirləri çərçivəsində özümüzü və ətrafımızı qorumağımız üçün verilən qərarlara riayət etmək hər birimizin borcudur, sosial məsuliyyətini nümayiş edən vətəndaşa isə təşəkkür edirik".
Qeyd edək ki, sosial şəbəkələrdə Sumqayıt şəhər 3 saylı poliklinikada vətəndaşlardan maska taxmağı tələb edən qeydiyyatçıların özlərinin maska taxmadıqları ilə bağlı video yayılmışdı.
14:03
Sosial şəbəkələrdə Sumqayıtda poliklinikaların birində vətəndaşlara xidmət edən tibb işçisinin maska taxmadığını əks etdirən video paylaşılıb.
1news.az-ın Qafqazinfo-ya istinadla verdiyi xəbərə görə, bu zaman növbədə dayanan şəxslər tibb işçisinə maska taxmadığına görə etiraz ediblər. Həmin etiraz poliklinikada gərgin anların yaşanmasına gətirib çıxarıb. Otaqda polis əməkdaşının olması və tibb işçisinə maska taxmadığına görə xəbərdarlıq etməməsi də müzakirələrə səbəb olub.
Daxili İşlər Nazirliyinin Mətbuat Xidmətindən Oxu.az-a məsələ ilə bağlı bildirilib ki, görüntülərdə əks olunan şəxslərlə bağlı Sumqayıt Şəhər Polis İdarəsinin əməkdaşları tərəfindən epidemiya əleyhinə rejim, sanitariya-gigiyena və karantin rejimləri dövründə fərdi qoruyucu vasitələrdən istifadə etməyən şəxslər barəsində protokollar tərtib olunaraq cərimə olunublar. Eləcə də poliklinika rəhbərliyi həmin şəxslərə töhmət elan edib.
