“Hökumət bunu etməsəydi iqtisadi tənəzzüldən qurtula bilməyəcəkdik” - Ekspert rəyi
"Pandemiya təkcə Azərbaycan iqtisadiyyatına zərbə vurmayıb, dünya iqtisadiyyatı üçün də böyük zərərlər törədib və törətməkdə hələ də davam edir. Odur ki, koronavirus pandemiyası iqtisadiyyatımıza həm dünyaya sirayət etməklə kənardan, həm də daxildə yayılaraq, içdən ciddi zərər vurdu".
Bunu 1news.az-a açıqlamasında iqtisadçı ekspert Pərviz Heydərov bildirdi. Müsahibim əlavə etdi ki, bu yaşanan ilk böhran deyil.
"Müstəqillik əldə etdikdən sonra 1997-1998-ci, 2008-2009-cu və 2014-2016-cı illərdə böhran yaşamışdıq, lakin bunların heç biri ölkəmizin iqtisadiyyatı üçün bu cür şok təsir bağışlamamışdı. Lakin iş ondadır ki, bu dəfə həm də daha yaxşı və güclü müqavimət göstərdik, göstərməkdə də davam edirik. Belə ki, böhran dövlətin və hökumətin qarşısında birdən-birə sayca iki olduqca mühüm və vacib məsələni həll etmək vəzifəsi qoydu, hökumət isə bunun müqabilində "başını itirmədi".
"Bu vəzifələr hansılar idi?" - sualını isə ekspert belə cavablandırdı:
" Birincisi, əhalinin sağlamlığının qayğısına qalmaq, ikincisi isə, iqtisadiyyatı neftin qiymətinin kəskin şəkildə aşağı düşməsindən, həmçinin, maliyyə və iqtisadi sarıdan daxili nizam-intizamın pozulmasından və baş verə biləcək xaos və misilsiz tənəzzüldən sığortalamaq. Azərbaycan dövlətinin və hökumətinin yaranmış vəziyyətlə əlaqədar çox çevik reaksiya göstərməsi, yuxarıda qeyd etdiyim hər iki vəzifəni həll etmək istiqamətində operativ fəaliyyəti və atdığı addımlar isə xarici dairələrin də diqqətindən yayınmayaraq, müsbət qiymətləndirildi.
2020-ci il ərzində 4,3 faiz gerilədik. Bu rəqəm daha böyük ola bilərdi, sadəcə, təkrar edirəm ki, hökumətin ilin əvvəlindən etibarən atdığı bir sıra qabaqlayıcı addımlar nəticəsində iri rəqəmli iqtisadi tənəzzüldən qurtulduq. Hazırda belə demək mümkündürsə, Azərbaycan pandemiya ilə postpandemiya dövrü arasında keçid mərhələni yaşayır. Dövlətimiz möhkəm makroiqtisadi dayanıqlığa sahibdir. Şəxsi subyektiv hesablamam odur ki, ölkə iqtisadiyyatının bilavasitə keçən ildə koronavirusla bağlı itkisi ən azı ÜDM-in proqnozlaşdırılan artım səviyyəsinə rəğmən, yuxarıda qeyd etdiyim 4.3 faiz tənəzzül qədərdir".
Aytən Sakitqızı
